Մոսկվայի քաղաքապետ Սերգեյ Սոբյանինը պաշտպանել է Ռուսաստանի կենտրոնական հատվածում «թոշակառուների փոքրիկ քաղաքներ» ստեղծելու գաղափարը, նաեւ խոստացել է մաքրել մայրաքաղաքը վնասակար արտադրություններից: Ինչպես տեղեկանում ենք news.am-ից՝ Բելգորոդի նահանգապետ Եվգենի Սավչենկոն նիստի ժամանակ առաջարկել է ինչ-որ կերպ լուծել Մոսկվայում խցանումների խնդիրը՝ վերաբնակեցման քաղաքականություն կիրառելով: «Եթե այստեղ (Մոսկվայում) ապրի 5 մլն մարդ, բոլոր հարցերը կլուծվեն առանց կապիտալ ներդրումների»,- ասել է Սավչենկոն: Սոբյանինը նշել է, որ «թեեւ առաջին հայացքից այդ առաջարկության մեջ անեկդոտության տարր կա, սակայն դրանում խելամտության հատիկ կա»: Նա ասել է, որ կարելի է թոշակառուներին նորմալ տարածքներ հատկացնել՝ նրանց համար փոքր քաղաքներ ստեղծելով: «Թոշակառուները պետք է իրենց նորմալ զգան: Այս տարվա ամռանը նրանք այս «արկղերի» մեջ խեղդվում էին եւ ավելի լավ է, որ ապրեն լավ ու փոքրիկ քաղաքներում՝ մայրաքաղաքից դուրս»,- նշել է Սոբյանինը: Նա նաեւ ընդգծել է, որ այդ քաղաքներում պետք է ստեղծել սոցիալական ու բժշկական բոլոր ենթակառուցվածքները:
