![\"\"](\"https://www.aravot.am/2010/aravot_arm/December/10/p1.jpg\")
«Առավոտը» այս տարվա հոկտեմբերի 8-ին «Կլասիկ խարդախություն» հրապարակմամբ տեղեկացրել է, որ մի կին տարբեր մարզերի եւ համայնքների տարբեր գերատեսչություններ է մտնում եւ, ներկայանալով որպես Հ1-ի «բարեգործական բաժնի աշխատակից», փորձում է ինչ-որ «բարի նպատակների համար» գումարներ շորթել, ասելով, որ դրանցից բաժին է հասնելու նաեւ հայաստանյան ամենաընթերցվող թերթերին, որոնք պարտավորվել են լուսաբանել Հ1-ի «բարեգործությունը»:
Ահազանգերից մեկի հետքերով գնալով՝ «Առավոտին» հաջողվել էր Կոտայքի մարզպետարան մտնել եւ դուրս գալուց լուսանկարել անհայտ «բարեգործին» եւ նրան տեղափոխող «Նիվա» մակնիշի ավտոմեքենան:
Մեր տեղեկություններով, հրապարակումից անմիջապես հետո ՀՀ ոստիկանության քննչական գլխավոր վարչության Հրազդանի քննչական բաժնում նյութեր են նախապատրաստվել, եւ արդեն նոյեմբերի 4-ին հարուցվել է քրեական գործ ՀՀ քրեական օրենսգրքի 178-րդ հոդվածի 2-րդ մասի, 3-րդ կետի (խարդախություն, որը կատարվել է կրկին անգամ) հատկանիշներով, ու նույն օրը քրեական գործը ուղարկվել է Կոտայքի մարզի քննչական բաժին:
