Իսրայելի իշխանություններն անհեթեթություն են որակել Եգիպտոսի մեղադրանքները, թե՝ Շարմ էլ-Շեյխի ափերում զբոսաշրջիկների վրա շնաձկների հարձակումներին առնչություններ ունի իսրայելական Մոսսադ հատուկ ծառայությունը:
Իսրայելի ԱԳՆ մամուլի խոսնակը BBC-ին ասել է, թե եգիպտական Հարավային Սինայ նահանգի ղեկավար Մուհամմեդ Աբդել Ֆադիլ Շուշան դիտել է «Երախ» գեղարվեստական ֆիլմն ու իրականությունը հորինվածքի հետ է շփոթել:
Նախօրեին եգիպտացի պաշտոնյան այդ երկրի հեռուստաեթերում հայտարարել էր, թե մարդասպան-շնաձկների հայտնվելը, ինչը լուրջ հարված է հասցնում երկրի զբոսաշրջության բիզնեսին, կարող է առնչություններ ունենալ իսրայելական Մոսսադ հետախուզական վարչության հետ:
«Նման սցենարը բացառված չէ, միայն ժամանակ է պետք դրանում համոզվելու համար»,- հայտարարել էր նահանգի ղեկավարը:
