![\"\"](\"https://www.aravot.am/2010/aravot_arm/December/8/p16.jpg\")
Մեծ Բրիտանիայի վարչապետ Դեւիդ Քեմերոնը Աֆղանստան կատարած այցի ժամանակ հայտարարել է, թե այդ երկրում առաքելություն իրականացնող բրիտանական զորքերը կարող են սկսել տուն վերադառնալ արդեն հաջորդ տարի: Բրիտանացի վարչապետը Աֆղանստան էր այցելել՝ այդ երկրում առկա իրավիճակն անձամբ գնահատելու համար: Նա շեշտել է, թե թալիբների դեմ պայքարում դրական առաջխաղացումն ու աֆղանցի ոստիկանների ուսուցման հարցում արձանագրված հաջողություններն իրեն ստիպում են հավատալ բրիտանական զորքերի դուրսբերման հեռանկարին:
«Մենք դեռ պետք է կատարենք այն, ինչ պետք է, բայց այսօր այն, ինչ տեսա, ինձ զգուշավոր լավատեսություն է ներշնչում: Աֆղանական ազգային բանակի մարտունակությանն ուղղված ուսումնական վարժանքները մենք իրականացնում ենք նախատեսված գրաֆիկից ավելի արագ տեմպերով: Ես հենց նոր տեսա, թե բրիտանացիների ղեկավարած ակադեմիան, որն ամեն ութ ամիսը մեկ 500 շրջանավարտ է տալիս, աֆղանցի ոստիկաններին ինչպես է կրթում: Լավատեսության հիմքեր կան»,- BBC-ի մատուցմամբ, հայտարարել է Դեւիդ Քեմերոնը:
Այդ տարվա նոյեմբերին Քեմերոնը Մեծ Բրիտանիայի խորհրդարանի պատգամավորներին խոստացել է, որ բրիտանացի զինվորականները Աֆղանստանը կլքեն մինչեւ 2015 թվականը:
Հիշեցնենք, որ Մեծ Բրիտանիայի վարչապետների կողմից Ծննդյան տոների նախաշեմին Աֆղանստան կատարվող այցելություններն արդեն ավանդական են դարձել: Աֆղանստանում ներկա դրությամբ տեղակայված է ավելի քան 10 հազար բրիտանացի զինծառայող:
