![\"\"](\"https://www.aravot.am/2010/aravot_arm/December/8/p15.jpg\")
Ինչպես հաղորդում է news.am-ը, դեկտեմբերի 6-ին Լոս Անջելեսում փոխհրաձգություն է եղել մի խումբ հայերի միջեւ: Արդյունքում մեկ մարդ զոհվել է, եւս մեկը մարմնական ծանր վնասվածքներ է ստացել:
Միջադեպը տեղի է ունեցել գիշերը, ժամը 2-ի սահմաններում, Վիքթորի փողոցում գտնվող McDonald’s ռեստորանի մերձակա ավտոկայանատեղիում: Ականատեսների վկայությամբ, 4 անձ տարբեր մեքենաներով մոտեցել են ավտոկանգառին, ապա սկսել հայերեն վիճել: Քիչ անց դեպքի վայրում կրակոցներ են հնչել:
Dailynews-ի փոխանցմամբ, ականատեսները ոստիկանություն են կանչել: Դեպքի վայր ժամանած իրավապահները հիվանդանոց են տեղափոխել երկու անձանց: 30-ամյա տղամարդը, ով հրազենային վնասվածք էր ստացել կրծքավանդակի հատվածում, մահացել է: Բժշկին հաջողվել է փրկել 20-ամյա երիտասարդի կյանքը: Նա վիրավորվել էր ոտքից եւ աջ ուսից: Ոստիկանության սերժանտ Քամերթը հայտնել է, որ հանցագործներին հաջողվել է կապույտ գույնի մեքենայով դեպքի վայրից փախուստի դիմել եւ թաքնվել: Լոս Անջելեսի ոստիկանությունը սկսել է հանցագործների որոնման ուղղությամբ միջոցներ ձեռնարկել:
