Հայաստանի 16 տարեկան շախմատիստների հավաքականը Թուրքիայի Բուրդուր քաղաքում պայքարի ավարտից մեկ տուր առաջ դարձավ այդ տարիքային խմբի համաշխարհային օլիմպիադայի հաղթող՝ կրկնելով 1998 թվականի արդյունքը:
Միայն ինն անընդմեջ հաղթանակից հետո, երբ մեր թիմն անհասանելի դարձավ մրցակիցների համար, գրոսմայստեր Արսեն Եղիազարյանի սաներն իրենց մի փոքր «անհոգ» լինելու իրավունք վերապահեցին՝ ոչ-ոքի խաղալով «Թուրքիա Սպիտակ» թիմի հետ: Եզրափակիչ տուրի բոլոր պարտիաները մեր տղաներն ավարտեցին շատ արագ՝ արձանագրելով ոչ-ոքիներ, ինչը, կարծում ենք, մրցակցի համար ցանկալի նվեր էր:
Սակայն հայաստանցի շախմատիստները, թիմային ոսկուց բացի, մի յուրօրինակ ռեկորդ էլ սահմանեցին անհատական պայքարում՝ չորս խաղատախտակներից երեքում հաղթող դառնալով: Առաջին խաղատախտակի առջեւ 10 տուրերին էլ մասնակցած Կարեն Գրիգորյանն իր անվան առջեւ գրանցեց 9,0 միավոր, որը 90 տոկոսանոց արդյունք է: Նրանից ընդամենը մեկ տասնորդական տոկոսով՝ 9-ից 8,0 միավոր, ետ մնաց երրորդ խաղատախտակի առջեւ լավագույն արդյունքը ցույց տված Հովհաննես Գաբուզյանը, իսկ Դավիթ Շահինյանը (4-րդ խաղատախտակ) 9 հնարավորից վաստակեց 7,5 միավոր (83,3 տոկոս) եւ նույնպես արժանացավ անհատական ոսկե մեդալի:
Համաշխարհային օլիմպիադային մասնակցած 22 թիմերի պայքարում մրցանակային եռյակը կազմեցին.
1. Հայաստան 30,5 թիմային միավոր
2. Հնդկաստան 27,5
3. Ռուսաստան 27,5
