Հայկական աստղագիտական ընկերության համանախագահ, Բյուրականի աստղադիտարանի առաջատար գիտաշխատող Արեգ Միքայելյանը «Առավոտին» տեղեկացրեց, որ գաղափար է առաջացել՝ ստեղծել գիտության մասին գրող լրագրողների խումբ եւ ունենալ հասցեների ցուցակ՝ Հայաստանում գիտական լրագրությունը եւ համապատասխան հրապարակումները զարգացնելու նպատակով: Համաշխարհային վիճակագրության համաձայն, տարբեր երկրների ԶԼՄ-ներում գիտական հրապարակումների 50-90%-ը որեւէ կերպ առնչվում է տիեզերական թեմաներին. աստղագիտություն եւ աստղաֆիզիկա, տիեզերական թռիչքներ, տիեզերական աղետներ, աստղակենսաբանություն, այլմոլորակայիններ եւ այլն: Այդ է պատճառը, որ որոշվել է ստեղծել նման խումբ եւ տեղեկատվությունն ուղիղ տարածել նրա անդամներին՝ հետագա ուսումնասիրության եւ հրապարակման համար:
