Եթե համեմատենք այն, ինչ քննարկվում է այսօր եւ 10 տարի առաջ 1915թ. իրադարձությունների թեմայով, կարելի է հսկայական տարբերություն տեսնել. «Արմինֆո»-ին այդպիսի կարծիք է հայտնել Անկարայի էկոնոմիկայի եւ տեխնոլոգիաների համալսարանի միջազգային հարաբերությունների դեպարտամենտի ղեկավար, պրոֆեսոր Մուսթաֆա Այդինը: Նրա խոսքով, այսօր թուրք հասարակությունը, մտավորականությունը, քաղաքական գործիչները բավական բացահայտ կերպով քննարկում են պատմությունը:
«Անշուշտ, ներկայումս ոչ ոք այդ իրադարձությունները ցեղասպանություն չի անվանի, դա արգելված բառ է, բայց կա մարդկանց խումբ, որն ընդունում է ողբերգական իրադարձությունները, եւ նրանք կոչում են դրանք որոշակի տերմինով»,- նշել է Այդինը: Նա ավելացրել է, որ այդ եւ ցանկացած այլ հարցի առնչությամբ դրսից ճնշումը հակառակ արդյունքի է հանգեցնում: Ենթարկվելով դրսի ճնշմանը՝ թուրք հասարակությունը լցվում է հակազդելու ավելի մեծ վճռականությամբ եւ դառնում ավելի համառ, ինչը բնականաբար խանգարում է այդ հարցերի լուծման հարցում դինամիկային:
