«Առավոտը» դժգոհություններ էր ստացել թիվ 122 դպրոցի աշակերտների ծնողներից այն մասին, որ դասասենյակները չեն ջեռուցվում, ու երեխաներից շատերը հիվանդ պառկած են: Դպրոցի փոխտնօրեն Հասմիկ Կանջիարովան մեզ տեղեկացրեց, որ դպրոցն ունի անհատական կաթսայատուն, որը որոշ պատճառներով չի գործարկվել: Դպրոցի տնօրեն Մարիա Մալախյանն էլ, որն, ի դեպ, վատառողջ էր, փոխանցեց, որ ձգձգումների պատճառը գազի վարչությունն է՝ դպրոցը 2 օր առաջ փոխանցել է 580000 դրամ, ու խոստացել են երեկ միացնել: Ավելի ուշ փոխտնօրենը տեղեկացրեց, որ իրենց դպրոցի ջեռուցումը արդեն միացված է: Նա նաեւ հավելեց, որ կրթօջախի շենքում առանձնապես շատ ցուրտ չէ, արեւկող դասարաններում ջերմաստիճանը նույնիսկ 20-ի է հասել:
