Գեղարքունիքի հաշմանդամություն ունեցող անձանց հարցերի մարզային հանձնաժողովի նախագահ, Գեղարքունիքի մարզպետի տեղակալ Արտուշ Ղուկասյանի տրամադրած տվյալների համաձայն, մարզում գրանցված է 13389 հաշմանդամ: Ըստ հանձնաժողովի նախագահի, անցնող տարում մանկուց հաշմանդամ 20 երեխայի տրվել է ֆինանսական օգնություն, մանկուց հաշմանդամ 130 երեխայի ամանորյա նվերներ են բաժանվել «Վորլդ Վիժն Ինթերնեյշնլ» կազմակերպության աջակցությամբ:
Մարզի Մարտունի, Ճամբարակ, Վարդենիս եւ Գավառ քաղաքներում, այդ թվում մարզպետարանի մուտքի մոտ, կառուցվել է ավելի քան մեկ տասնյակ թեքահարթակ՝ հաշմանդամների մուտք ու ելքը ապահովելու համար: Գեղարքունիքում գործում է 1 հատուկ դպրոց, որտեղ սովորում է մարզի տարբեր համայնքներից հատուկ կարիքներով 90 երեխա, իսկ Գավառի դպրոցներից մեկում կազմակերպվել է ներառական կրթություն 15 երեխայի համար: Առաջիկայում վերականգնողական կենտրոններ են բացվելու Մարտունիում եւ Վարդենիսում: Գեղարքունիքի մարզի Սեւանի տարածաշրջանը միակն է, որտեղ հաշմանդամության խնդիրներով զբաղվող հասարակական կազմակերպություններ չկան: Իսկ Գեղարքունիքի մարզպետարանում վստահ են, որ հաշմանդամություն ունեցող անձանց հարցերի մարզային հանձնաժողովը պետք է ավելի հաճախ հանդես գա հաշվետվությամբ եւ ընդլայնի համագործակցությունը ինչպես տեղական ինքնակառավարման մարմինների, այնպես էլ՝ հ/կ-ների հետ:
