Դեռեւս 2005 թվականին՝ Հրանտ Մաթեւոսյանի ծննդյան 70-ամյակի հոբելյանական միջոցառումների ժամանակ, որոշվել էր Հրանտ Մաթեւոսյանի ծննդավայրում՝ Լոռու մարզի Ահնիձոր գյուղում, կիսակառույց երկհարկանի տունը ավարտին հասցնել եւ հանձնել եղբորը՝ Համլետ Մաթեւոսյանին բնակության համար, իսկ գրողի հայրական տունը դարձնել տուն-թանգարան: Մաթեւոսյանի ընտանիքի անդամներն այժմ առաջարկում են 300 քմ տարածք տրամադրել մշակութային կենտրոն կառուցելու համար: Հարցը սակայն ձգձգվում է: Հրանտ Մաթեւոսյանի որդուն՝ Դավիթ Մաթեւոսյանին ասել են, որ հարցը ուսումնասիրվում է, ֆինանսական հաշվարկներ են արվում: Դավիթը ցավում է, որ Լոռու մարզպետարանը այս նպատակի համար փող չունի, իսկ ՀՀ կառավարությունը հարցը ձգձգում է:
Օգոստոսի 8-ին տեղեկացրել ենք, որ օգոստոսի 7-ի ուժգին կարկտահարությունից մեծ վնասներ է կրել Ահնիձոր գյուղը, նաեւ՝ մեծանուն գրող Հրանտ Մաթեւոսյանի հայրական տունը: Գրողի եղբայր Համլետ Մաթեւոսյանն ասաց, որ կարկուտի վնասները վերացնելու հարցում պետական կառույցները աջակցել են իրենց:
Հրանտ Մաթեւոսյանի ծննդավայր Ահնիձորի եւ նրա հայրական տան մասին առավել մանրամասն՝ առաջիկայում:
