Կոտայքի մարզի ընդհանուր իրավասության դատարանը նոյեմբերի 29-ին Չարենցավանի ոստիկանությունում անհասկանալի հանգամանքներում մահացած Վահան Խալաֆյանի գործով 8 տարվա ազատազրկման դատապարտեց բաժանմունքի պետ Աշոտ Հարությունյանին: Ինչպես տեղեկացրել ենք, օպեր լիազորներից Մորիս Հայրապետյանը դատապարտվեց 2 տարվա պայմանական ազատազրկման: Դատարանը բավարար չի համարել ոստիկանության նույն բաժանմունքի ավագ օպեր-լիազորներ Գարիկ Դավթյանին եւ Գագիկ Ղազարյանին պաշտոնեական լիազորությունները չարաշահելու համար ՀՀ քրեական օրենսգրքի 308-րդ հոդվածի 1-ին մասով առաջադրված մեղադրանքի ապացույցները եւ նրանց մասով կայացրել արդարացման դատավճիռ: Մեղադրողներ Կորյուն Փիլոյանն ու Հարություն Հարությունյանը, որոնք դատավճռի հրապարակման օրը ներկա չէին, հայտնել են, որ Գ.Դավթյանին եւ Գ.Ղազարյանին մեղադրանք առաջադրելու համար ապացույցները եղել են բավարար եւ նրանց մասով կներկայացնեն վերաքննիչ բողոք:
