Երեկ նախագահական նստավայրի դիմաց Նոր Արեշ 35 փողոցի 127/1 շենքի բնակիչները բողոքի ցույց էին կազմակերպել: Նրանց շենքը 4-րդ կարգի վթարային է եւ, ըստ բնակիչների, ամեն րոպե փլվելու վտանգի առաջ է կանգնած:
Շենքը նախկինում եղել է հանրակացարան: Տարիներ առաջ բնակիչների մի մասին հատկացվել են բնակարաններ, սակայն ծրագիրը կիսատ է մնացել:
News.am-ի փոխանցմամբ, բնակիչները դժգոհել են, որ շենքի վիճակը վերջին շրջանում սկսել է ավելի վատանալ. «Գրունտային ջրերը հավաքվում են հենց շենքի նկուղում: Արդյունքում՝ 140 ընտանիքներ ամեն վայրկյան կարող են կորցնել տանիքը։ Երեխաներից շատերը ծնվում են տարաբնույթ հիվանդություններով, իսկ առողջները հիվանդանում են հետագայում»։ Բնակիչների մի մասը ներկայումս դուրս է եկել շենքից եւ բնակվում է հարազատների մոտ։
Նախագահական նստավայրի մոտ հավաքվածները պահանջում էին շուտափույթ իրենց ապահովել բնակարաններով։ Սա, ի դեպ, նրանց առաջին բողոքի ակցիան չէ, սակայն որեւէ արդյունքի չեն հասել։ Իրենց խոսքով՝ «գնդակի նման մի տեղից մյուս տեղն են տշում»։
