Ըստ ԵԽԽՎ-ում հայաստանյան պատվիրակության ղեկավար Դավիթ Հարությունյանի՝ եթե ԵԽԽՎ-ում այնուամենայնիվ ստեղծվի Ղարաբաղի հարցով ժամանակավոր հանձնաժողով,
ինչին շարունակ ձգտում է Վեհաժողովի թուրք նախագահը, ապա մենք գիտենք, թե ինչ ենք անելու:
ԵԽԽՎ նախագահ Մեւլութ Չավուշօղլուն օրերս կրկին խոսել է Խորհրդարանական վեհաժողովում Ղարաբաղի հարցող ենթահանձնաժողով ստեղծելու մասին: «Մենք կփորձենք Եվրախորհրդարանում առկա խնդիրները լուծել, դրա համար առաջին հերթին այցելել եմ այնպիսի երկրներ, ինչպիսիք են, օրինակ, Ալբանիան եւ Բոսնիան: Ինչ վերաբերում է Լեռնային Ղարաբաղի հակամարտությանը, ապա այդ հարցի հետ կապված, որպես նոր քայլ, մենք կստեղծենք ենթահանձնաժողով: Հունվարին այդ հարցը օրակարգի մեջ կմտցնենք»,- ասել է թուրք պատգամավորը: Հիշեցնելով, որ Վեհաժողովի նախագահ ընտրվելուց ի վեր ինքը հինգ անգամ հանդիպել է Հայաստանի եւ Ադրբեջանի պատվիրակությունների հետ, պարոն Չավուշօղլուն նաեւ խոստացել է. «Այդ խնդրի հետ կապված՝ մենք ավելի ակտիվ կլինենք»:
Հայաստանի Ազգային ժողովի պետաիրավական հարցերի մշտական հանձնաժողովի նախագահ, ԵԽԽՎ-ում հայաստանյան պատվիրակության ղեկավար Դավիթ Հարությունյանը երեկ լրագրողների խնդրանքով անդրադառնալով Չավուշօղլուի այս կարգի հերթական հայտարարությանը՝ նշեց, թե ենթահանձնաժողով ստեղծելու գաղափարն ամենեւին էլ Չավուշօղլուինը չէ. «Այն պատկանում է ԵԽԽՎ-ին, եւ հանրահայտ 1416 բանաձեւում դրա մասին պահանջը ներկայացված է եղել: Մենք եւ այն ժամանակ ենք համարել, որ դա սխալ քայլ է, նաեւ խոսել ենք այն մասին, որ փորձը ցույց տվեց, որ դա սխալ է: Երրորդ՝ առ այս պահը մենք չենք փոխել մեր դիրքորոշումը եւ այդպիսի հանձնաժողովի ստեղծումը համարում ենք անիմաստ եւ վերջին երեք տարիների ընթացքում այդ մասին շարունակ խոսել ենք ԽՎ-ում: Չորրորդ՝ ես չեմ կարող բացառել, որ Վեհաժողովի բյուրոն, ոչ թե պարոն Չավուշօղլուն, այնուամենայնիվ, կստեղծի նման ժամանակավոր հանձնաժողով: Մենք դեմ ենք լինելու դրան, եւ եթե հանկարծ ստեղծեն, մենք մեր անելիքը գիտենք»: Հարցին՝ ո՞րն է լինելու այդ անելիքը, պարոն Հարությունյանը հետեւյալ պատասխանը տվեց. «Եթե ձեզ թվում է՝ ես հիմա բացահայտելու եմ, դուք սխալվում եք»:
Մարտի մեկի դեպքերից հետո ազատազրկված եւ վերջերս պայմանական-վաղաժամկետ ազատ արձակված Հայ ազգային կոնգրեսի Լոռու կառույցի ղեկավար Աշոտ Մանուկյանը եւ Մուշեղ Սաղաթելյանը իրենց ազատ արձակելու որոշումը կապում են Հայաստանի իշխանությունների վրա միջազգային կառույցների կողմից գործադրվող ճնշումների հետ: Դավիթ Հարությունյանը երեկ, պատասխանելով «Ազատություն» ռադիոկայանի հարցին, ասաց, թե «ճնշում» բառն իրեն դուր չի գալիս. «Ճիշտն ասած, ինձ դուր չի գալիս այդ «ճնշում» բառը, որովհետեւ շատ գնահատողական դատողություն է: Այն հարցադրումները, որոնք կային՝ մնացել են եւ անփոփոխ են: Բացենք վերջին երկու տարվա [ԵԽԽՎ] բանաձեւերը եւ կտեսնենք, թե ինչ հարցադրումներ կային, դրանից ավելի որեւէ նոր քայլ կատարված չէ: Ինչ վերաբերում է ազատված անձանց՝ նրանք պնդում են, որ դա քաղաքական ճնշման արդյունքում է: Բնական է՝ սա քաղաքական պայքարի տարր է, շատ բնական է, որ նրանք դա պետք է օգտագործեն»:
Ըստ ԱԺ պետաիրավական հարցերի մշտական հանձնաժողովի նախագահի՝ «Նրանք ազատվել են քաղաքական պահանջի առկայության պայմաններում, բայց իրավական գործընթացներով»: Հնարավո՞ր է, որ նույն «քաղաքական պահանջի» արդյունքում առաջիկայում ազատ արձակվեն անազատության մեջ գտնվող ընդդիմադիր մյուս գործիչները: Ի պատասխան այս հարցի՝ Դավիթ Հարությունյանն ասաց. «Չկա քաղաքական պահանջ կամ քաղաքական մոտեցում, որ անթույլատրելի կլիներ այդ անձանց պայմանական-վաղաժամկետ ազատումը»:
