![\"\"](\"https://www.aravot.am/2010/aravot_arm/November/26/p17.jpg\")
Հինգշաբթի օրը Չինաստանը դժգոհություն է հայտնել Դեղին ծովում անցկացվող ԱՄՆ-ի եւ Հարավային Կորեայի համատեղ զորավարժությունների առնչությամբ, իսկ Հյուսիսային Կորեան սպառնացել է Սեուլի կողմից «հերթական սադրանքների դեպքում» նոր՝ երկրորդ եւ նույնիսկ երրորդ անգամ հարձակումներ իրականացնել: Այդ մասին հաղորդում է Reuters-ը: Փխենյանի կողմից Յոնպխենդո կղզիների հրետակոծությունից հետո Սեուլը հայտարարել է Հյուսիսային Կորեայի հետ սահմաններին զինվորականների թիվն ավելացնելու մտադրության մասին:
Ընդսմին, Հարավային Կորեայի պաշտպանության նախարար Կիմ Տե Յունը վերջին միջադեպի առնչությամբ իրեն ուղղված քննադատությունից հետո հրաժարական է ներկայացրել: Երկրի նախագահի աշխատակազմում հաստատել են այդ տեղեկությունը՝ հավելելով, որ նախարարի հրաժարականն ընդունվել է:
Վաշինգտոնն իր հերթին ուժեղացնում է Չինաստանի վրա գործադրվող ճնշումը՝ պահանջելով, որ վերջինը զսպի իր դաշնակից Հյուսիսային Կորեային, թեեւ Չինաստանի ԱԳՆ ներկայացուցիչը առաջին հերթին կարեւորել է Փխենյանի հետ վեցկողմյա՝ երկու Կորեաների, Ռուսաստանի, Չինաստանի, Ճապոնիայի եւ ԱՄՆ-ի մասնակցությամբ, բանակցությունները վերականգնելու անհրաժեշտությունը: Այդուհանդերձ, Չինաստանի ԱԳՆ ներկայացուցիչն ասել է, թե իր երկիրն անհանգստացած է կորեա-ամերիկյան համատեղ եւ «Ջորջ Վաշինգտոն» ատոմային ավիակիրի մասնակցությամբ իրականացվող զորավարժությունների առնչությամբ: Ավիակիրը, որի տախտակամածին 75 ինքնաթիռ կա, Ճապոնիայի հենակետը լքել է չորեքշաբթի օրը՝ Հարավային Կորեայի ռազմական նավերի հետ մինչեւ հաջորդ չորեքշաբթի շարունակվող համատեղ զորավարժություններին մասնակցելու նպատակով:
