Բազմազավակ մոր 6 երեխաներից երկուսը կույր են
![\"\"](\"https://www.aravot.am/2010/aravot_arm/November/25/p6.jpg\")
![\"\"](\"https://www.aravot.am/2010/aravot_arm/November/25/p7.jpg\")
Կույր երեխաները՝ Ալեքն ու Մկրտիչը, սպասում են մարդկանց բարեգթությանը:
«Ալեքը մեկուկես տարեկան էր, երբ մի օր նկատեցինք, որ աչքերը մի տեսակ կարմրած էին: Տարանք Մալայանի անվան ակնաբուժական կլինիկա, այնտեղ առաջին անգամ իմացանք, որ մեր երեխան կույր է, երկու աչքն էլ չէր տեսնում: Մենք ապշել էինք, որովհետեւ երբ խաղալիք էինք տալիս, նա արձագանքում էր: Փաստորեն, կամ բնազդով է վերցրել, կամ էլ այն ժամանակ դեռ լույսն ու ստվերը զգացել է: Մալայանի կլինիկայում ախտորոշեցին, որ Ալեքն ունի ռետինաբլաստոմա: Մենք այն ժամանակ չէինք հասկանում՝ ինչ է դա նշանակում: Փաստորեն, երեխայի երկու աչքերի նյարդի վրա ուռուցք կար»,- արցունքն աչքերին պատմում էր Ալեքի մայրը՝ Դիանա Կարապետյանը: Երբ բժիշկները փոքրիկի հարազատներին հայտնել են, որ ռետինաբլաստոման ժառանգական է եւ գեներից է փոխանցվել նրան, Ալեքի ընտանիքում նոր տագնապ է սկսվել, որովհետեւ Դիանան հղի է եղել, եւ վտանգը մեծ էր, որ այդ երեխան էլ կույր կծնվեր. «Ես բազմազավակ եմ, եւս 4 երեխա ունեմ, եւ զարմանալի էր, որ նրանք տեսողական խնդիրներ չունեն: Մենք Ալեքի անալիզներն ուղարկեցինք Մոսկվայի գենետիկ կենտրոն ու պարզվեց, որ 12 պորտ այն կողմ իսկապես պապայի կողմն ունեցել է այդ հիվանդությունը: Ամբողջ մեր ազգում միայն Ալեքին է բաժին հասել դա, այն կրկնվել է: Ես շատ էի վախեցել ու պատրաստ էի ընդհատել հղիությունս, բայց այստեղ դոպլեր հետազոտություն արեցին ու բժիշկները վստահեցրին, որ այդ երեխան միանգամայն առողջ է, հղիությունը նորմալ էր ընթանում ու որեւէ հիվանդություն չախտորոշեցին»: Չնայած համոզված են եղել, որ ընտանիքի 6-րդ երեխան՝ Մկրտիչը, Ալեքի նման տեսողական խնդիրներ չի ունենա, այնուամենայնիվ, իրենց խղճի հանգստության համար նրա ծնվելուց անմիջապես հետո փոքրիկին տարել են ստուգման ու սարսափելի ապրումների մեջ ընկել, երբ բժիշկները հայտնաբերել են նույն հիվանդությունը. «Մենք դեռ չէինք կարողացել գումար հավաքել Ալեքի վիրահատության համար, բայց պարզվեց՝ շտապ քիմիաթերապիա է պետք մեր նորածնին»:
Ալեքի ու Մկրտիչի ընտանիքն ապրում է Կոտայքի մարզի Առինջ գյուղում: Մայրը չի աշխատում, հայրը շինարար է, որն ամսական 80-100 հազար դրամ է աշխատում. «Այդ գումարով հազիվ երեխաների դպրոցի, հագուստի, սննդի հարցերն ենք լուծում, ամենամեծ երեխաս 8 տարեկան է, հազիվ ենք ծայրը ծայրին հասցնում: Եթե իմանայինք, որ ոչնչով չենք կարող մեր երեխաների տեսողությունը ետ բերել, մի կերպ կհաշտվեինք այդ մտքի հետ: Բայց 4700 դոլարով հնարավոր կլինի գոնե նրանց մեկ աչքը փրկել, նրանք գոնե կկարողանան լույսն ու ստվերը տարբերել, տարիներ հետո մենք մեզ չենք ների, եթե իմանանք, որ կարող էինք ինչ-որ բան անել ու մի քանի տոկոս տեսողություն տալ մեր երեխաներին, բայց ոչինչ չարեցինք»:
Նշենք, որ վերջին շրջանում տեսողական, տեղաշարժման կամ այլ խնդիրներ ունեցող երեխաների հաշվին շատ տարածված է ինչ-որ մելամաղձոտ բովանդակությամբ սցենար պատրաստել ու մարաթոններ, դրամահավաքներ կազմակերպել՝ սփյուռքից կամ Հայաստանի բարերարներից գումարներ հավաքելու նպատակով: Ուստի մենք ամենայն մանրամասնությամբ ուսումնասիրել ենք այս երկու երեխաների բժշկական փաստաթղթերն ու ստուգել ախտորոշման իսկությունը:
Փաստաթղթերի համաձայն, Մալայանի ակնաբուժական կենտրոնից 2 տարեկան Ալեքին ու 3 ամսական Մկրտիչին ուղեգրել են Մոսկվա, որտեղ հորդորել են անհապաղ ուռուցքը հեռացնել, քիմիաթերապիա եւ բրախիթերապիա նշանակել: Այդ նշանակումները ժամանակին կատարելու դեպքում, գոնե նրանց մեկ աչքը քիչ թե շատ կտեսնի: Քանի որ Ալեքն արդեն մեծ է եւ ուռուցքը փակել է նրա ողջ տեսողությունը, ըստ բժշկական ցուցումների, ցանկալի ժամկետը՝ թերապիաները սկսելու համար, դեկտեմբերի սկիզբն է, նա արդեն մեկ կուրս քիմիաթերապիա ընդունել է, որը կօգնի գոնե ուռուցքի աճը կանգնեցնել: Ալեքի վիրահատության համար Մոսկվայում պահանջել են 3500 դոլար, Մկրտիչի համար՝ 1200 դոլար: Բազմազավակ մայրը համոզված է, որ այս աշխարհում դեռ կգտնվեն մարդիկ, որոնք թեկուզ մի լումա կնվիրեն՝ երկու անմեղ երեխաների տեսողությունը վերականգնելու համար: «Հայէկոնոմբանկում» նրանց համար Դիանա Կարապետյանի անունով հաշվեհամար է բացվել. դրամական փոխանցումների համար՝ 163007529353, դոլարով՝ 163058009636, իսկ եվրոյով փոխանցումների համար՝ 163058009644:
