![\"\"](\"https://www.aravot.am/2010/aravot_arm/November/20/p12.jpg\")
Ի թիվս վեց երկրների՝ Ռուսաստանը հրաժարվել է մասնակցել Խաղաղության նոբելյան մրցանակի հանձնման՝ դեկտեմբերի 10-ին Օսլոյում կայանալիք պաշտոնական արարողությանը: Հիշեցնենք, որ այս անգամ Խաղաղության նոբելյան մրցանակը շնորհվել է 11 տարվա ազատազրկման դատապարտված չին Լյու Սյաոբոյին: Reuters-ի մատուցմամբ, Նոբելյան հանձնաժողովի քարտուղար Գեյր Լունդեստադը հայտնել է, որ մրցանակաբաշխության արարողությանը, բացի Ռուսաստանից, հրաժարվել են մասնակցել նաեւ Չինաստանը, Ղազախստանը, Կուբան, Մարոկոն եւ Իրաքը: Լունդեստադի համոզմամբ, մրցանակաբաշխության բոյկոտը կազմակերպել է Չինաստանը: «Ես չգիտեմ այլ օրինակներ, երբ երկիրն այդքան ակտիվորեն եւ բաց տեքստով պահանջել է, որպեզի դեսպանները ձեռնպահ մնան Նոբելյան մրցանակի հանձնմանը մասնակցելուց»,- հայտարարել է հանձնաժողովի քարտուղարը:
Նորվեգիայում ՌԴ դեսպանության մամուլի կցորդ Վլադիմիր Իսուպովն ասել է, թե Ռուսաստանի՝ արարողությանը մասնակցելուց հրաժարվելը Չինաստանի հետ չի համաձայնեցվել: «Դեսպանը արարողության օրը պարզապես երկրում չի լինելու»,- հայտարարել է Իսուպովը՝ միաժամանակ հավելելով, որ իրեն հայտնի չէ, թե ինչ գործուղման է մեկնելու դիվանագիտական առաքելության ղեկավարը:
Աղբյուրը նշել է, թե Ռուսաստանը լրջորեն է վերաբերվում Չինաստանի դիվանագիտական պահանջներին, մասնավորապես Պեկինի առարկությունների պատճառով 1996-2004թթ. արգելվել էր Ռուսաստանի տարածք Դալայ-Լամայի մուտքը:
