Իջեւանի տարիքը ճշտվում է
«Առավոտի» նոյեմբերի 16-ի համարում «Հոբելյան, որ այդպես էլ չնշվեց» լուրով տեղեկացրել էինք, որ Տավուշի մարզկենտրոն Իջեւանը 200 տարեկան է, սակայն տոնը չի նշվում: Հրապարակմանը արձագանքել է ՀՀ Տավուշի մարզպետարանը: «Տարեթիվը դեռեւս հստակ չէ» վերնագրով պատասխանում մարզպետարանը պարզաբանում է. «Իջեւան քաղաքի հիմնադրման վերաբերյալ մասնագետների կողմից դեռեւս որեւէ վերջնական գիտական հիմնավորում չի արվել: Այս պահին էլ Իջեւան քաղաքի Թեւրաքար կոչվող տարածքում հնագետների կողմից պեղումներ են անցկացվում, որոնց ընթացքում հայտնաբերվում են դեռեւս ուրարտական ժամանակաշրջանի իրեղեն նմուշներ: Պատմությունից հայտնի է, որ 200 տարի առաջ բնակավայրում ընդամենը եղել են բնակչության տեղաշարժեր, բայց դա չի նշանակում, որ Իջեւանը 200 տարեկան է: Այնպես որ, ոչ թե քաղաքի հոբելյանը նշելու ցանկություն չկա, այլ դեռեւս հստակ եզրակացություն չկա այդ տարեթվի վերաբերյալ: Միայն հստակեցումից հետո, իմանալով հնարավորինս ճշգրիտ տարիքը, եւ՛ մարզի ղեկավարությունը, եւ՛ իջեւանցիները մեծ ուրախությամբ կնշեն իրենց քաղաքի տոնը»:
