Երեկ ՀՀ ԳԱԱ-ում նշվեց ակադեմիայի առաջին հասարակագիտական հանդեսի՝ «Լրաբերի» հիմնադրման 70-ամյակը: Չորս ամիսը մեկ տպագրվող հանդեսը 70-ամյա «կենսագրության» ընթացքում խմբագրել են Սահակ Կարապետյանը, Հրանտ Բատիկյանը, Հովսեփ Օրբելին, Հովհաննես Ինճիկյանը, Վարդգես Միքայելյանը եւ այլք: «Առավոտը» զրուցեց հանդեսի գլխավոր խմբագիր, պատմական գիտությունների դոկտոր Ալբերտ Խառատյանի հետ: Նա նշեց. «Հանդեսը մասնակցում է գիտության զարգացմանը՝ հրապարակելով հայագիտական, հասարակական բնույթի բազում հոդվածներ, աշխատություններ, աղբյուրագիտական նյութեր, գրախոսականներ: Տպագրվում են նաեւ մանկավարժությանը, լեզվաբանությանը, գրականությանը նվիրված նյութեր»: Հետաքրքրվեցինք՝ հանդեսն այսօր ի՞նչ խնդիրներ ունի: Պարոն Խառատյանը պատասխանեց. «Հիմնական խնդիրներից է՝ բարձրացնել խստապահանջությունը հոդվածների որակի նկատմամբ, նոր կապեր հաստատել արտասահմանի հետ, հանդեսը տպագրել եվրոպական լեզուներով եւ այլն»:
