Այսօր Հայաստանի ազգային գրադարանը իր շրջիկ գրադարանով կայցելի Երեւանի Նանսենի 1 հասցեում գտնվող թիվ 99 նախապատրաստական ուսումնական հաստատություն: Բիբլիոբուսում մանուկները կծանոթանան հայ եւ օտարազգի մանկագիրների գրքերի ցուցադրությանը՝ Լիպարիտ Սարգսյանի, Սուրեն Մուրադյանի, Էդվարդ Միլիտոնյանի, Երվանդ Պետրոսյանի, Աթաբեկ Խնկոյանի եւ այլ գրողների գրքերին՝ մոտ 200 միավոր:
Մանկապարտեզում մանուկների հետ հանդիպմանը կմասնակցեն նաեւ մանկագիրներ: Հայաստանի ազգային գրադարանը եւ մանկագիրները երեխաներին կնվիրեն մանկական գրքեր, գրենական պիտույքներ, կլինեն գրական կարճ ներկայացումներ: Կներկայացվեն խտասկավառակներ, որտեղ Հովհաննես Թումանյանի մի քանի հեքիաթներն են եւ «Սասունցի Դավիթ» էպոսի «Դավոյի ամուսնությունը» գլուխը՝ Սուրեն Քոչարյանի եւ Ժան Էլոյանի ընթերցմամբ: Այդ խտասկավառակները Ազգային գրադարանը կնվիրի մանկապարտեզին: Այս նախաձեռնությունը՝ մանուկների շրջանում գրքի քարոզչությունը, Ազգային գրադարանը կդարձնի շարունակական:
