![\"\"](\"https://www.aravot.am/2010/aravot_arm/November/18/p11.jpg\")
Երեկ ԵՊՀ ուսանողական խորհրդի նախաձեռնությամբ համալսարանի մեծ դահլիճում կայացավ «Ուսանող 2010» համերգ-մրցանակաբաշխությունը:
ԵՊՀ ռեկտոր Արամ Սիմոնյանը շնորհավորելով ուսանողներին տոնի կապակցությամբ, նշեց, որ մեր օրերի ուսանողը հաջողակ է, քանի որ ապրում է անկախության պայմաններում:
Ուսանողական խորհրդի կողմից մրցանակներ հանձնվեցին ԵՊՀ ֆակուլտետային մրցույթներում հաղթած 23 ուսանողի, որոնք ճանաչվեցին «Ուսանող 2010»: Մեդալներ շնորհվեցին ՏՏ ոլորտում ՀՀ նախագահի ամենամյա կրթական մրցանակին արժանացած՝ 7, Բուլղարիայում կայացած մաթեմատիկայի ամենամյա օլիմպիադայում մեդալներ նվաճած, գերազանց առաջադիմություն ունեցող եւ բանակ զորակոչվող ուսանողների: Մրցույթում ընդգրկված էին նաեւ ԵՊՀ Իջեւանի մասնաճյուղի, Եվրոպական ուսումնասիրությունների կենտրոնի, ՏՏ կրթական ուսումնական կենտրոնի սաները:
Թե ինչ խնդիրներ ունի հայ ուսանողը՝ պարզեցինք հարցման միջոցով: Ուսանողներից շատերի կարծիքով՝ հիմնականը դասախոս-ուսանող հարաբերություններն են:
Ռադիոֆիզիկայի ֆակուլտետի 2-րդ կուրսի ուսանող Պետրոս Օհանյանը նշում է, որ ավագ սերնդի դասախոսների հետ բախումներից երբեմն խուսափելն անհնար է լինում. «Նրանք երբեմն ալարում են այնպես բացատրել առարկան, որ ուսանողի համար ավելի հասկանալի լինի: Արդյունքում չես կարողանում սիրել առարկան, չես նստում դասի, կիսամյակի վերջում էլ դասախոսը պահանջում է գիտելիք, որը բավարար չափով չի տվել»: Մաթեմատիկայի եւ մեխանիկայի ֆակուլտետի 2-րդ կուրսի ուսանող Նարեկ Բալեյանը ուսանող-դասախոս խնդրի լուծումը տեսնում է կրթության որակի բարելավման մեջ. «Ինձ թվում է՝ դա կարող է լուծել ուսանողի բոլոր խնդիրները՝ վերջ դնել կաշառակերությանը»:
ԵՊՀ պրոռեկտոր Ռուբեն Մարկոսյանը նույն խնդրի վերաբերյալ ասաց. «Դասախոս-ուսանող հարաբերությունները բազմաբնույթ են, դրանք ձեւավորվում են ավանդույթների հիման վրա: Այս հարցում ե՛ւ ուսանողը, ե՛ւ դասախոսը շատ անելիք ունեն: Մենք չունենք գործընկերային հարաբերությունների ձեւավորման մշակույթ՝ ուսանողների հետ: Դեռեւս այն աստիճանի վրա ենք, որ դասախոսը դիտարկվում է ուսանողի համար նույն մոդելով, ինչպես ուսուցիչը՝ աշակերտի համար: Այսինքն՝ դասախոսը դիտարկվում է միայն սովորեցնողի դերում, իսկ ուսանողը նույն կարծրատիպի համաձայն՝ դասերը սովորողի»:
