![\"\"](\"https://www.aravot.am/2010/aravot_arm/November/17/p15.jpg\")
BBC-ի փոխանցմամբ, բրիտանական կառավարությունը մտադիր է դրամական փոխհատուցում տալ Գուանտանամոյի բանտի նախկին մի քանի կալանավորների: Նրանցից մեկը, աղբյուրի ասելով, կարող է ստանալ մոտ 1 մլն ֆունտ ստերլինգի փոխհատուցում:
Բրիտանական կառավարության ներկայացուցիչը հայտարարել է, թե համապատասխան գրավոր հայտարարությունն արդեն ուղարկվել է խորհրդարան:
Ենթադրվում է, որ բրիտանական իշխանություններին հաջողվել է արտադատարանական համաձայնության հասնել Գուանտանամոյի 12 նախկին բանտարկյալների հետ, ովքեր երկրի արդարադատության բարձր դատարանում դատական հայցեր էին ներկայացրել: Հայցվորների թվում եղել են նաեւ Մեծ Բրիտանիայի քաղաքացիներ, նաեւ օտարերկրացիներ, որոնք այդ երկրում քաղաքական ապաստան ստանալու խնդրանքով դիմել էին բրիտանական իշխանություններին:
Նախկին այդ կալանավորների ասելով, բրիտանական իշխանությունները ժամանակին տեղյակ են եղել, որ իրենց ապօրինաբար երկրից հանել են Գուանտանամո բանտ տեղափոխելու համար, բայց ոչինչ չէին արել դրան խոչընդոտելու համար: Նրանք նաեւ պնդել են, թե բրիտանական հատուկ ծառայությունները մասնակից են եղել ամերիկյան բանտում իրենց նկատմամբ իրականացված կտտանքներին եւ ստորացումներին:
Հիշեցնենք, որ բրիտանական հատուկ ծառայությունները մշտապես հերքել են իրենց առնչությունը Գուանտանամոյի բանտում կալանավորների նկատմամբ իրականացված խոշտագումներին:
