Թուրքիայի նախագահ Աբդուլա Գյուլի՝ այս ամսվա վերջին Լիբանան այցելությանը նախապատրաստվում են նաեւ լիբանանահայ երիտասարդները: HayNews.am-ին Լիբանանի Սոցիալ-Դեմոկրատ Հնչակյան կուսակցության «Սարգիս Տխրունի» ուսանողական-երիտասարդական միության ատենապետ Գրիգոր Դեքիրմենջյանը փոխանցել է, որ, ըստ նախնական տվյալների, Գյուլը Լիբանանում կլինի նոյեմբերի 25-ին՝ մասնակցելու հարավային Սայդա շրջանում հիվանդանոցի բացմանը, որտեղ մեծ է եղել նաեւ թուրքական կապիտալը: «Լիբանանահայ երիտասարդները պատրաստվում են այդ օրերին ցույցեր եւ հրապարակային բողոքի այլ ակցիաներ իրականացնել՝ բողոքելով Թուրքիո նախագահի այցելության դեմ: Այսօր պաշտոնական Անկարան շարունակում է հակահայ իր քաղաքականությունը, չի ճանաչում դարասկզբի ոճիրը՝ Հայոց ցեղասպանությունը, օկուպացված է պահում մեր հողերը: Լիբանանահայ երիտասարդներն այդքան վճռականություն ունեն, որպեսզի այս պահանջները լսելի դարձնեն նաեւ Գյուլի համար»,- ասել է Գրիգոր Դեքիրմենջյանը:
