![\"\"](\"https://www.aravot.am/2010/aravot_arm/November/16/p25.jpg\")
Երեկ «Ուրբաթ» մամուլի ակումբի հյուրը երգիչ Արթուր Հակոբյանն էր՝ հայտնի Mister X բեմական անվամբ: Առիթը նոյեմբերի 20-ին «Ա. Խաչատրյան» մեծ համերգասրահում կայանալիք մենահամերգն է, որտեղ երգիչը հանդես կգա առանց դիմակի: «Այնպես եմ հուզվում, կարծես առաջին մենահամերգս լինի, ի դեպ՝ առաջինը եւս կայացել է «Ա. Խաչատրյան» համերգասրահում»,- ասաց երգիչը: «Տոմսերը լիովին սպառված են»,- կիսաժպիտը դեմքին նշեց երգիչը ու պատմեց, թե ինչ է նախատեսվում համերգի ընթացքում: Ըստ նրա, կհնչեն իր հին ու նոր երգերը՝ շոու-բալետի կատարումների ուղեկցությամբ: Համերգին կոնֆերանսիե չի լինի: Պատճառը ոչ թե հայկական շոու-բիզնեսում ընդունված շաբլոններից դուրս գալն է, այլ երգիչն ուզում է հանդիսականի հետ հեշտությամբ կապ հաստատել: «Բեմում պատմում եմ այս կամ այն երգի պատմության մասին, երբեմն էլ լռում եմ, փորձում եմ ապրումներս փոխանցել հանդիսականին»,- ասաց Ա. Հակոբյանն ու հավելեց, որ իր երգացանկում, ինչպես միշտ, դասական գործերն են գերիշխում եւ անցյալում հայտնի հիթեր: Հեղինակային երգեր էլ կան:
Լրագրողների հարցին՝ արդյո՞ք կերգի 6/8 չափի մեջ գրված երգեր, Ա. Հակոբյանը տվեց բացասական պատասան. «Եթե երգեմ, ապա ինքս ինձ համար, բայց պետք է շատ լավ տրամադրություն ունենամ»: Խոսելով 6/8 չափի մեջ գրված երաժշտության մասին՝ Ա.Հակոբյանը նշեց Սիլվա Հակոբյանի անունը, ում, ըստ նրա, շատ լավ հաջողվում է կատարել դրանք: Երգիչը առաջիկայում կունենա նաեւ տեսահոլովակներ, թեպետ հնարավորինս շատ տեսահոլովակներ ունենալու ցանկություն առանձնապես չունի. «Շարլ Ազնավուրն էլ տեսահոլովակներ չունի…»: Հնարավոր է` իր մենահամերգն ունենա DVD տարբերակ: Հայաստանյան մենահամերգից անմիջապես հետո երգիչը կմեկնի համերգային շրջագայության: Առաջին երկիրը, ուր կայցելի՝ Իրանն է: Առաջարկներ եւ հրավերներ ունի ԱՄՆ-ից, Կանադայից: Երգիչը այսօր չունի պրոդյուսեր եւ բոլոր կազմակերպչական հարցերով զբաղվում է ինքը: «Ես եկել եմ այն եզրակացության, որ Երեւանում ամեն նախագծի համար պետք է տարբեր խմբերով աշխատես: Ինչն էլ անում եմ»,- ասում է նա:
