![\"\"](\"https://www.aravot.am/2010/aravot_arm/November/12/p24.jpg\")
Նոյեմբերի 15- ին Մարզահամերգային համալիրում հանդես կգա աշխարհահռչակ երաժիշտ եւ կոմպոզիտոր Գորան Բրեգովիչն իր Հարսանեկան ու Թաղման (Wedding & Funeral Orchestra) նվագախմբով:
Նրա այցը «Երեւանյան հեռանկարներ» միջազգային երաժշտական փառատոնի շրջանակներում է: Գորան Բրեգովիչին աշխարհը հիմնականում գիտի որպես ֆիլմերի, մասնավորապես՝ սերբ ռեժիսոր Էմիր Կուստուրիցայի որոշ ֆիլմերի («Գնչուների ժամանակը», «Անդերգրաունդ», «Արիզոնական երազանք») երաժշտության հեղինակ:
Ի դեպ, պատանեկան տարիքում Գորան Բրեգովիչին երաժշտական դպրոցից, որտեղ նա ջութակի դասեր էր առնում, հեռացրել են «տաղանդի» բացակայության պատճառով: Հետագայում նա սովորել է կիթառ նվագել, ընդունվել արվեստի դպրոց, որտեղից՝ կարճատեւ սովորելուց հետո, մայրը նրան հանել է՝ այն մտավախությամբ, թե իբր շատ են արվամոլները: Նա ընդունվում է ավտոմոբիլային դպրոց, ապա գիմնազիա, նվագել է տեղի խմբում իբրեւ բաս-կիթառահար: Հետո ստիպված լինելով վաստակել սեփական հացը, նվագել է զանազան ակումբներում եւ հյուրանոցներում:
Դառնալով նրա Wedding & Funeral Orchestra-ին, հավելենք, որ նվագախմբի հետ Բրեգովիչը շրջել է ողջ աշխարհով: Բրեգովիչն իրեն համարում է հարավսլավացի, քանի որ հայրը խորվաթ է, մայրը՝ սերբ, կինը՝ մուսուլմանուհի: Ներկայումս ապրում է Փարիզում՝ կնոջ եւ երեք դուստրերի հետ:
