«Վերջերս հայ-վրացական սահմանային անցակետում տեղի է ունեցել մի միջադեպ, որի ժամանակ Վրաստանի իշխանությունները կրկին անգամ ի ցույց են դրել Հայաստանի ու Ջավախքում բնակվող հայերի նկատմամբ իրենց լկտի կեցվածքը՝ համահունչ ՀՀ իշխանությունների վարած պարտվողական եւ ամորֆ քաղաքականության»,- ասված է «Սարդարապատ» շարժման երեկ տարածած հայտարարության մեջ։ Հոկտեմբերի 24-ին Ախալքալաք քաղաքում կայանալիք միջոցառմանը որպես հրավիրյալ պետք է ներկա գտնվեր նաեւ ՀՀ սպորտի եւ երիտասարդության հարցերի նախարարի տեղակալ Արսեն Քարամյանը։ Վերջինիս այցելության կապակցությամբ Վրաստանի պատկան մարմինները դիվանագիտական պատշաճ իրազեկում էին ստացել։ Նշված օրը Բավրայի սահմանային անցակետում վրացական կողմի աշխատակիցները Արսեն Քարամյանին թույլ չեն տալիս ազատ տեղաշարժվել Վրաստանի տարածքով եւ երկար ժամանակ տեղում սպասեցնում են։ Որոշ ժամանակ անց Թբիլիսիից ժամանած հատուկ ավտոշարասյունը իր մեջ ներառելով փոխնախարարի ավտոմեքենան՝ շարժվում է Թբիլիսի՝ արգելելով փոխնախարարի մուտքը Ախալքալաք:
