Երեքշաբթի օրը Հունաստանի մայրաքաղաքում մի քանի պայթյուն է որոտացել: Նախ, պայթել է Աթենքում Շվեյցարիայի դեսպանության մոտ ականապատված մի փաթեթ: Ավելի ուշ հունական ոստիկանությունը վերահսկող պայթեցմամբ ոչնչացրել է եւս մեկ ռումբ, որը փաթեթավորված վիճակում գտնվել է բուլղարական դեսպանատանը: Ոստիկանությունը նաեւ վնասազերծել է կասկածելի մի փաթեթ, որը հայտնաբերվել է երկրի խորհրդարանի մոտ կայանված փոստային ծառայության ավտոբեռնախցիկում: Փաթեթը հասցեագրված է եղել Չիլիի դեսպանությանը: Եվս մեկ պայթյուն տեղի է ունեցել Աթենքում Ռուսաստանի դեսպանատանը: Reuters-ի փոխանցմամբ, հիշյալ միջադեպերի արդյունքում ոչ ոք չի տուժել: Պայթյունների վայրում ոստիկանությունը ձերբակալել է երկու երիտասարդի, որոնք եղել են ծայրահեղական խմբավորման անդամներ:
Նախօրեին հաղորդվում էր, թե Աթենքում չարագործները փորձել են փաթեթավորված ռումբեր ուղարկել օտարերկրյա մի քանի դեսպանություններ: Նրանցից մեկը, իբր, հասցեագրված է եղել Ֆրանսիայի նախագահ Նիկոլա Սարկոզիին: Պայթուցիկ սարքերը առգրավվել են փաթեթների փոխանցման կասկածանքով ձերբակալված երկու տղամարդկանցից:
