Երեկ արտակարգ իրավիճակ էր ստեղծվել արդարադատության նախարարության «Սեւան» քրեակատարողական հիմնարկում: Վաղաժամկետ պայմանական ազատման համար ՀՀ նախագահի հրամանով ստեղծված անկախ հանձնաժողովին դիմած դատապարտյալները մերժվել էին: Դրանից հետո 15 եւ ավելի դատապարտյալներ բարձրացել էին տանիք եւ չէին իջնում այնտեղից: ՔԿՀ պատժիչ ռեսուրսը գնում էր միայն մի ուղղությամբ՝ Սեւան, կանխելու անհնազանդության հնարավոր զարգացումները: Դատապարտյալները ասում էին, որ մտադիր չեն իջնելու տանիքից՝ մինչեւ լրագրողների այցը: Սակայն ավելի ուշ նրանք իջան տանիքից՝ հայտարարելով, որ հացադուլ են սկսում: Դրանից հետո նրանց այցելեց ՔԿՀ վարչության պետի տեղակալ Վարուժան Մելքոնյանը: Պարոն ՄԵլքոնյանի հետ զրույցից հետո դատապարտյալներն ասեցին, որ վեց օրով հետաձգում են իրենց հացադուլը:
