![\"\"](\"https://www.aravot.am/2010/aravot_arm/October/29/p28.jpg\")
Օրերս արտասահմանյան մամուլը հրապարակել է UFC 121-ում ամենամեծ գումարներ վաստակող մարզիկների անունները եւ նրանց հոնորարների չափերը, որից կարելի է պատկերացում կազմել, թե ինչ գումարներ են շրջանառվում «Մարտեր առանց կանոնների» մենապայքարային մարզաձեւում:
Պարզվում է, որ այնտեղ բավականին լուրջ դերակատարություն ունի ոչ այնքան հանդիպման արդյունքը, որքան տվյալ մարզիկի հեղինակությունն ու համբավը: Օրինակ, հանրահայտ ծանր քաշային Բրոք Լեսնարը չնայած մի քանի օր առաջ աշխարհի չեմպիոնի կոչումը զիջեց Կաին Վելասկեսին, սակայն վաստակի առումով հայտնվեց անհամեմատ ավելի շահեկան վիճակում, քան տվյալ օրվա մրցակիցը եւ UFC121-ի մյուս մարզիկները: Նշված մարտում Լեսնարի հոնորարը կազմել է $400 հազար, իսկ Վելասկեսին հասել է $100 հազար, գումարած նույնքան էլ՝ հաղթանակի համար:
Մարտը տանուլ տված, սակայն եկամուտով հաղթած է դուրս եկել նաեւ կիսածանր քաշային կարգում արդեն աշխարհի նախկին չեմպիոն Տիտո Օրտիսը, որը թեեւ պարտվել էր, ստացավ $250 հազար, իսկ նորընծա չեմպիոն Մեթ Հեմիլտոնին բաժին հասավ $29 հազար ու էլի նույնքան՝ որպես հաղթող: Եվ, վերջապես, «Strikeforce»-ի փոխչեմպիոն Ջեյկ Շիլդսը, առաջին անգամ մասնակցելով UFC-ի մենամարտերին, ընդհանուր առմամբ վաստակեց $150 հազար, իսկ նրա մրցակցի՝ Մարտին Կեմպմենիի բաժինը կազմեց $27 հազար:
