![\"\"](\"https://www.aravot.am/2010/aravot_arm/October/28/p3.jpg\")
Պնդում է Հոկտեմբերի 27-ի գործով դատավարության ժամանակ Դեմիրճյանների շահերի ներկայացուցիչ Աշոտ Սարգսյանը:
– Պարոն Սարգսյան, Դուք Հոկտեմբերի 27-ի գործով դատավարության՝ տուժողների շահերի թերեւս ամենաակտիվ ներկայացուցիչ-փաստաբանն եք եղել, եւ անհնար է, որ երեք տարի ձգված դատաքննության ընթացքում Ձեզ համար բացահայտումներ արած չլինեիք. կա՞ն բաներ, որոնք 27-ի գործով Դուք գիտեք, իսկ հասարակությունը՝ ոչ:
– Բացահայտումներ, իհարկե, եղել են: Դրանցից մեկը եւ, կարծում եմ, ոչ ամենեւին անկարեւորն այն էր, որ մեր կողմից ապացույցների հետազոտումները, առաջ քաշած վարկածները, բազմաթիվ իրար հակասող ցուցմունքները եզրակացնել են տալիս, որ հանցագործության գործիք հանդիսացող զենքերը նախապես եղել էին Ազգային ժողովում: Կան այս մասին վկայող բազմաթիվ փաստեր, որոնք մենք ներկայացրել ենք ինչպես 27-ի, այնպես էլ նրանից անջատված մասով պատկան մարմիններին: Տեսեք, ոճրագործներն ասում էին, թե զենքերն իրենք ԱԺ էին մտցրել իրենց վրա կախված վիճակում: Սակայն բազմաթիվ մանր թվացող փաստերի վերլուծություններից, օրինակ՝ բաճկոնների կոճկված լինել-չլինելու հանգամանքից եւ այլն, պարզ է դառնում, որ նրանք այդ զենքերը չեն մտցրել իրենց հետ: Այս առումով ամենակարեւորն այն հանգամանքի վերհանումն էր, որ եթե, ինչպես փորձում էին համոզել հանցագործության կատարողները, իրենք զենքերը մտցրել էին ԱԺ իրենց վրայից կախված եւ հետո էին միայն դանակով կտրել դրանք ամրացնող թելերը, ապա ո՞ւր էին այդ թելերը նկարահանված կադրերում, ինչպե՞ս եղավ, որ դրանք կտրված վիճակով կախ ընկած չէին զենքերից: Այնպես որ, վստահ կարող եմ ասել. զենքերը նախապես եղել են Ազգային ժողովի ներսում: Եվ եթե ցանկություն լիներ բացահայտելու այս եւ նման փաստերը, քննություն անցկացնելու ու պարզելու՝ ով էր ներս բերել զենքերը, եւ երբ էին դրանք բերվել, ավտոմատ կերպով կբացահայտվեին նաեւ հանցագործության կազմակերպիչները: Այնպես որ, միայն առաջին հայացքից է թվում, թե սա գլոբալ բացահայտում չէ:
– Փաստորեն, այն համընդհանուր համոզմունքը, որ հանցագործությունը կազմակերպված բնույթ է կրել, հիմնազուրկ չէ՞:
– Միայն մանկամիտ, պարզունակ մարդը կարող է մտածել, թե դա այն հինգ հոգու ձեռքի գործն էր միայն: Իհարկե, կազմակերպված էր, ընդ որում՝ լուրջ կազմակերպված՝ բոլոր մանրուքներով:
– Որպես անձ, փաստաբան, ով նաեւ մասնակցել է 27-ի դատավարությանը, Ձեր եզրակացությունը՝ ո՞ւմ կողմից էր կազմակերպված այն:
– Դա հավասարապես կարող է լինել եւ դրսի ուժ, հավասարապես՝ եւ ներսի, եւ երկուսը միասին: Քենեդիի ժամանակները, երբ մի մարդ կարող էր զենք վերցնել ու կրակել, վաղուց վերջացել են: Հիմա քաղաքական սպանությունները շատ լուրջ են կազմակերպվում, շատ լուրջ, ինչպես Հոկտեմբերի 27-ը:
