![\"\"](\"https://www.aravot.am/2010/aravot_arm/October/26/p16.jpg\")
Սլովենիան իր պատմության մեջ առաջին անգամ սեւամորթ՝ ծագումով գանացի քաղաքապետ ունեցավ: Associated Press-ի մատուցմամբ, Պիտեր Բոսսմանը կիրակի օրը՝ հոկտեմբերի 24-ին, 17 հազար բնակչություն ունեցող Պիրան քաղաքի քաղաքապետի ընտրությունների երկրորդ փուլի արդյունքում հաղթել է գործող քաղաքապետ Տոմազ Գանտարին՝ ստանալով ընտրողների 51,4 տոկոսի քվեն: Նրա մրցակցի օգտին քվեարկել է քաղաքի բնակիչների 48,4 տոկոսը:
«Այն փաստը, որ ինձ ընտրել են այդ պաշտոնում՝ վկայում է Սլովենիայում ժողովրդավարության բարձր մակարդակի մասին»,- ընտրությունների նախնական արդյունքների հրապարակումից հետո հայտարարել է Բոսսմանը:
Բոսսմանը Սլովենիա էր եկել բժշկական կրթություն ստանալու համար՝ դեռ 1980-ականներին, երբ այդ երկիրը գտնվում էր Հարավսլավիայի կազմում: Այդ ընթացքում, արդեն ավելի քան 20 տարի, նա ամուսնացել էր խորվաթ բժշկի հետ եւ բնակություն հաստատել Սլովենիայում: Նախընտրական արշավի ընթացքում Բոսսմանը, որին անվանում էին «Պիրանի Օբաման», քաղաքի զարգացման նոր ուղղություն էր հայտարարել զբոսաշրջության ոլորտը: Նա մասնավորապես առաջարկում էր քաղաքում էլեկտրաշարժերի ենթակառուցվածք ստեղծել եւ բացել գոլֆի դասընթացներ:
