ՅՈՒՆԵՍԿՕ-ի բժշկակենսաբանական ամբիոնի գիտական քարտուղար Լիլիթ Հայրապետյանը «Առավոտին» ուղարկած նամակում գրել է, որ Իսլամական բանկը հրաժարվում է Իրաքի քաղաքացիներին տրամադրել դրամաշնորհ՝ Հայաստանի համալսարաններում կրթություն ստանալու համար: «Վերջերս ՅՈՒՆԵՍԿՕ-ի Բժշկակենսաբանական ամբիոն էր դիմել Իրաքի Մոսուլ համալսարանի դոցենտ Էնտիսար Ալ Հակեմը, Իսլամական զարգացման բանկից շահած կրթաթոշակային դրամաշնորհով (4000 ԱՄՆ դոլար) իր հետդոկտորական վերապատրաստումը Հայաստանում անցնելու խնդրանքով: Սակայն բանկը մերժել էր իրաքցի գիտնականին՝ պատճառաբանությամբ, որ հայաստանյան ոչ մի գիտակրթական հաստատություն չի մտնում աշխարհի առաջատար համալսարանների ռեյտինգային ցուցակում: Այս փաստը ցույց է տալիս, որ Հայաստանի կրթական համակարգն իր հետամնաց գիտահամալսարանական քաղաքականությամբ դուրս է մնացել տարածաշրջանային կրթական շուկայից»,- գրում է Լ. Հայրապետյանը:
