Կապանի բժշկական կենտրոնի վնասվածքաբանական բաժանմունքից երեկ արդեն տուն է տեղափոխվել հոկտեմբերի 15-ին ազատագրված տարածքներում արջի հարձակումից վնասվածքներ ստացած 35-ամյա զինվորական Տիգրան Ղամբարյանը: Պայմանագրային զինծառայողը Կապանի հիվանդանոց էր տեղափոխվել պատառոտված ու խոր վերքերով: Հիշեցնենք, որ Տիգրանի հետ դեպքը տեղի էր ունեցել աշխատանքի գնալուց առաջ, երբ եգիպտացորենի արտ սիլոս հավաքելու էր գնացել: Երիտասարդի վրա հանկարծակի հարձակվել էր արտում գտնվող արջը եւ խոր վնասվածքներ հասցրել նրան: Վնասվել է հատկապես ձախ դաստակը, որը տուժողը պաշտպանվելու նպատակով մտցրել էր արջի բերանը: Տիգրանի պատմելով՝ վախեցած էր գիշատիչ կենդանու հարձակումից, որովհետեւ երբեւէ այդ կողմերում արջի չէր հանդիպել: «Էդ պահին չգիտեի, թե ինչ էի անում, պաշտպանվո՞ւմ էի հոշոտումից, թե՞ կռիվ էի տալիս հետը: Միայն մի բան գիտեմ, որ բախտս բերեց՝ փոքր արջ էր, թե չէ հիմա կենդանի չէի լինի»,- ասում է տուժածը: Կռիվը տեւել է 10-13 վայրկյան, քանի որ արջը իր դիմադրությունից հետո փախել է:
Բժիշկների կողմից Տիգրանի առողջական վիճակը դրական գնահատելուց հետո տուժածը վիրակապով տուն է տեղափոխվել, որտեղ եւ բժիշկների խորհրդով պետք է շարունակի բուժումը: «Վերքերը թեեւ լավանում են, բայց ինֆեկցիաների տեսակետից հնարավոր է հետագայում խնդիրներ առաջանան, դուրսգրումից հետո պետք է ապաքինվողը հետեւողական լինի բարդություններից խուսափելու համար: Սա առաջին դեպքն է, որ արջից վնասված հիվանդ եմ ունենում, այսքան տարի նման դեպք մեզ մոտ չի գրանցվել, եղել են շան, էշի կամ օձի կծած դեպքեր, բայց արջի՝ ոչ»,- մեզ հետ զրույցում նշեց բժիշկ Սարիկ Աթաջանյանը:
