Կալիֆոռնիայում գտնվող «Համաշխարհային ժառանգության հիմնադրամ»-ը ներկայացրել է վտանգի տակ գտնվող մշակութային արժեքները, որոնց մեջ է հայտնվել Թուրքիայի տարածքում գտնվող հայկական պատմական Անի քաղաքը:
Ինչպես հայտնում է news.am-ը՝ հղում անելով թուրքական Radikal-ին, «Համաշխարհային ժառանգության հիմնադրամ»-ը իր «Պահպանել մեր կորցրած ժառանգությունը» անունով զեկույցի մեջ ընդգրկած 12 հուշարձանա-մշակութային կենտրոնների մեջ ներառած եւ Թուրքիայի տարածքում գտնվող 10-11-րդ դարերում Հայաստանի մայրաքաղաք հանդիսացած Անիի հուշարձանների պահպանության հետ կապված լուրջ մտահոգություններ է ներկայացնում: Ըստ որի՝ 10-11-րդ դարում Հայաստանի մայրաքաղաք Անին հայկական քաղաքակրթության անզուգական արժեք է: «Անիի ավերակների մեջ ամենատպավորիչ եկեղեցու՝ 1001-ին կառուցված Անիի մայր տաճարի ոճը մեկ հարյուրամյակ հետո կրկնօրինակեցին Եվրոպայում: Այժմ անհրաժեշտ է աշխատանքներ սկսել՝ կանգնեցնելու Անիի ավերումը, եւ պահպանության տակ առնել այն»,- նշվել է զեկույցում: Անիին նվիրված 2 էջանոց զեկույցում նշվել է, որ Անին անբավարար հոգածության պատճառով կանգնել է ոչնչացման վտանգի առաջ, քանի որ վերանորոգման անվան տակ ենթարկվում է մի շարք բացասական նախաձեռնությունների:
