Երեկ ԳԱԱ Արեւելագիտության ինստիտուտում հանդիպում էր նախատեսված Հայաստանում գերմանական համալսարանի դոցենտ Անդրեաս Գյոտցենի հետ: Նա որոշել է Հայաստանում պաշտպանել իր դոկտորական թեզը եւ իր հետազոտությանը վերաբերող թեմաների՝ Պաղեստինի եւ Մերձավոր Արեւելքի քրիստոնյա համայնքների զարգացման պատմական գործընթացների, սիոնիստների եւ այլ հարցերի շուրջ դասախոսություն կարդալ՝ ինստիտուտի աշխատակիցների եւ ուսանողների համար: Մինչեւ դասախոսություն կարդալը, նա լրագրողների հետ ճեպազրույցում ասաց. «Քրիստոնեական համայնքները Մերձավոր Արեւելքում միշտ որոշակի խնդիրներ են ունենում, եւ քրիստոնյա աշխարհը միշտ պետք է զորավիգ լինի քրիստոնյա համայնքներին Մերձավոր Արեւելքում՝ աջակցելով նրանց կենսագործունեությանն ու հոգեւոր մշակութային կյանքին»: Նա հայտնեց, որ քրիստոնեական համայնքների համար առաջին խնդիրը արտագաղթն է, ինչպես նաեւ քրիստոնեական համայնքների իսլամացումը: Ա. Գյոտցենի խոսքով, շատ քրիստոնյաներ իսլամանում են, որովհետեւ ցանկանում են այդ երկրներում ավելի ապահով ապրել: Նշենք, որ հանդիպումը լուսաբանելու համար նախապես տեղեկացրել էին նաեւ լրատվամիջոցներին: Սակայն հանդիպման սկզբում գերմանացի դոցենտին ուղեկցող Հայաստանում գերմանական համալսարանի հիմնադիր-նախագահ Էդուարդ Սարոյանն առաջարկեց հյուրին դասախոսությունը կարդալ կա՛մ գերմաներեն, կա՛մ անգլերեն: Լրագրողների՝ հայերեն թարգմանելու խնդրանքին պարոն Սարոյանն արձագանքեց, թե չեն պատրաստվում անտեղի ժամանակ վատնել թարգմանության վրա, նշելով, որ իրենց համար ոչ թե լրագրողները, այլ ուսանողներն են կարեւոր:
