![\"\"](\"https://www.aravot.am/2010/aravot_arm/October/22/p15.jpg\")
Թեհրանում տեղի ունեցած հանդիպման ժամանակ Իրանի նախագահ Մահմուդ Ահմադինեջադն ու Վենեսուելայի առաջնորդ Ուգո Չավեսը խոստացել են միմյանց խորացնել իրենց ռազմավարական դաշինքը ընդդեմ «ամերիկյան իմպերիալիզմի»: Հանդիպման ընթացքում երկու երկրների նախագահներն իրար «եղբայր»-ով են դիմել ու խոսել են նաեւ այն մասին, որ ոչ ոք եւ ոչինչ չի կարող խանգարել իրենց զարգացնելու եւ ամրապնդելու երկու երկրների հարաբերությունները:
Ահմադինեջադը հայտարարել է, թե երկու երկրներն էլ կկառուցեն նոր աշխարհակարգ, որտեղ Միացյալ Նահանգները գերիշխող չի լինի: Չավեսն իր հերթին դատապարտել է միջազգային հանրությանը՝ Իրանի դեմ պատժամիջոցներ կիրառելու եւ ռազմական գործողություններով վախեցնելու համար: BBC-ի փոխանցմամբ, երկու առաջնորդներն էլ համոզմունք են հայտնել, որ Արեւմուտքի տիրակալության ժամանակը մոտենում է ավարտին: «Իմպերիալիզմը հասել է իր անկման վճռական փուլին, եւ մեռնող փղի նման գնում է գերեզմանատուն»,- հայտարարել է Ուգո Չավեսը: Ահմադինեջադին, թերեւս, մնացել է հավելել այն, ինչ եւ նա ասել է. «Մեր ժողովուրդների թշնամիները մի օր կընկնեն: Դա աստվածային մարգարեություն է, որը եւ կկատարվի»:
