![\"\"](\"https://www.aravot.am/2010/aravot_arm/October/22/p14.jpg\")
Երեկ, ֆիլիպինյան Մինդանաո կղզում ուղեւորատար ավտոբուս է պայթեցվել: Associated Press-ի փոխանցմամբ, դա տեղի է ունեցել այն պահին, երբ ավտոբուսը Մատալամ քաղաքից ուղեւորվել է Կոտաբատո: Նախնական տվյալներով, պայթել է ավտոբուսի տանիքի բեռների համար նախատեսված հատվածում տեղադրված ռումբը: Պայթյունի ժամանակ ավտոբուսում 50 ուղեւոր է եղել, նրանցից ութը տեղում մահացել է: Պայթյունն այնքան հզոր է եղել, որ ոմանց գլուխը մարմնից պոկվել է: Եվս 9 հոգի ծանրության տարբեր աստիճանի վնասվածքներ է ստացել:
Ահաբեկչական ակտի պատասխանատվությունը որեւէ ծայրահեղական խմբավորում չի ստանձնել: Ոստիկանության առաջ քաշած վարկածներից մեկով՝ պայթյունը կազմակերպել են ավտոբուսային ընկերության սեփականատերերից գումարներ շորթող գրոհայինները: Իրավապահները կարծում են, որ ավտոբուսի պայթեցման նպատակը ավտոբուսային ընկերություններին, նաեւ գրոհայինների հետ համագործակցելուց հրաժարվող գործարարներին վախեցնելու նպատակ է ունեցել:
Ֆիլիպինների՝ ավանդաբար անհանգիստ համարվող, հարավում տրանսպորտային փոխադրողներից դրամաշորթությունն ու նրանց վախեցնելու նպատակով ահաբեկությունների իրականացումը շատ տարածված պրակտիկա է: Այդ տարածաշրջանում ամենաազդեցիկ խմբավորումներից մեկը համարվում է իսլամիստական «Էլ-Խուբար» խմբավորումը, որը նախկինում էլ բազմաթիվ անգամ խմբավորմանը «հարկ» չտալու համար ավտոբուսներ կամ գործարարների գրասենյակներ է պայթեցրել:
