66-ամյա հնդկուհին ամենածեր կինն է աշխարհում, ում հաջողվել է այդ տարիքում ծննդաբերել եռյակ՝ արհեստական բեղմնավորումից հետո, որը անցկացվել է Խարիանեում: Նախկինում անպտուղ Բհատերի Դեվին ծննդաբերել է երկու տղա եւ մեկ աղջիկ: Ներկայումս երեխաները գտնվում են ինտենսիվ թերապիայի բաժանմունքում, քանզի ծնվել են նվազ քաշով: Բժիշկ Անուրագ Բիշնոն, ով զբաղվում էր կնոջ բուժմամբ, նշում է. «Ծննդյան վկայականի համաձայն՝ Բհատերի Դեվին ծնվել է 1944 թ. մայիսի 21-ին: Նա մեզ այցելել է վերջին ամիսներին՝ բուժման համար: Սա մայր դառնալու նրա առաջին փորձն էր, որը պսակվեց հաջողությամբ: Երեխաները լույս աշխարհ են եկել կեսարյան հատման միջոցով»:
Դեվիի ամուսինը՝ 64-ամյա Դեվա Սինգխը, շատ ուրախ էր հայր դառնալու կապակցությամբ: Նա նույնպես այլ երեխաներ չուներ: «Կինս իրականացրեց իմ հայր դառնալու եւ ընտանիքի ժառանգ ունենալու ցանկությունը: Դեվին իմ առաջին կինն է: Այն բանից հետո, երբ նա չէր կարողանում հղիանալ, ես ամուսնացա եւս երկու անգամ, սակայն իմ կանանցից ոչ մեկն ինձ երեխա չպարգեւեց: Այժմ ես շատ երջանիկ եմ»,- հայտարարել է նա:
