Վրաստանի արտգործնախարարությունը Հարավային Օսեթիայի սահմանակից վրացական Փերեւի գյուղից ռուսական զորքերի դուրսբերումը որակել է որպես «ճիշտ ուղղությամբ կատարված», բայց «միկրոսկոպիկ քայլ»: Վրաստանի ԱԳՆ-ն միաժամանակ Ռուսաստանին կոչ է արել հարգել միջազգային իրավունքի նորմերն ու սկզբունքները:
Հիշեցնենք, որ ռուսական զորքերը շուրջ հազար բնակչություն ունեցող Փերեւի գյուղ էին մտել դեռ 2008թ. ռուս-վրացական հնգօրյա ռազմական հակամարտության ընթացքում: Գյուղը լքելու մասին որոշումն ընդունվել էր օրերս՝ Ժնեւում, միջազգային կառույցների միջնորդությամբ անցկացվող ռուս-վրացական բանակցությունների հերթական փուլի արդյունքում: Ռուսական զորքերի դուրսբերումը սկսվել էր երկուշաբթի օրը: Երեկվա դրությամբ գյուղն արդեն գտվում էր վրաց ոստիկանների լիակատար վերահսկողության տակ:
