Հայաստանում օտարալեզու կրթությամբ դպրոցները կոչված են զերծ պահելու հայկական ընտրախավի երեխաներին «հասարակ մահկանացու» աշակերտներից, «Արմինֆոյի» թղթակցի հետ զրույցում այդպիսի կարծիք է հայտնել Հայաստանի հելսինկյան կոմիտեի նախագահ Ավետիք Իշխանյանը:
Ըստ իրավապաշտպանի, ինքը վստահ չէ այն բանում, թե այսօր Հայաստանի կառավարության կողմից հայտարարվող նման դպրոցների թիվը (11) կպահպանվի: «Բանն այն է, որ էլիտար դպրոցների ստեղծմամբ ուժեղանում է սովորողների միջեւ բեւեռացումը: Բնականաբար, մեծանում է նաեւ «էլիտար» աշակերտներից հետ չմնալու ցանկություն ունեցողների քանակը: Եվ իշխանությունները ստիպված կլինեն նոր ուսումնական հաստատություններ բացել: Գուցե սցենարը չափազանց հոռետեսական է, սակայն հեռու չէ իրողությունից»,- ընդգծել է Իշխանյանը: Նա ավելացրել է, որ նման սցենարի զարգացման դեպքում մեր երկիրը 30-40 տարի անց ազգային աղետի առաջ կկանգնի: «Անհրաժեշտ է մտածել, թե ինչ ենք մենք այսօր թողնում ապագա սերունդներին, արդյո՞ք հիմք ենք ստեղծում ազգային ինքնագիտակցության հետագա զարգացման համար, ինչը շատ դժվար է պատկերացնել առանց մայրենի լեզվի»,- ասել է նա:
