![\"\"](\"https://www.aravot.am/2010/aravot_arm/October/15/p17.jpg\")
Չիլիի Սան-Խոսե հանքավայրում տեղի ունեցած վթարից հետո մոտ 700 մետր խորությամբ 69 օր շարունակ արգելափակված բոլոր 33 հանքափորները դուրս են բերվել հորից եւ տեղափոխվել են հիվանդանոց: Հանքափորների դուրսբերման աշխատանքները տեւել են մեկուկես օր:
BBC-ի փոխանցմամբ, վերջին հանքափորը, որը դուրս է բերվել գետնի տակից, եղել է հեթափոխի պետը՝ Լուիս Ուրսուան: Հենց նրա շնորհիվ է, որ 33 հանքափորները վթարից հետո առաջին 17 օրերին կարողացել են կենդանի մնալ, երբ շատերը նրանց արդեն մահացած էին համարում: Երկրի նախագահ Սեբաստիան Պիներան, որը վերջին օրերին մշտապես գտնվել է հանքահորի մոտ՝ փրկարարների կողքին, երջանկությամբ հայտարարել է, թե հպարտ է նախագահ լինելու համար: Փրկարարների բարեհաջող իրականացրած գործողությունից հետո հանքափորներից շատերի մոտ ատամնային ծանր վարակ եւ տեսողության հետ կապված խնդիրներ են ի հայտ բերվել: Սակայն երկրի առողջապահության նախարարը շեշտել է, որ ընդհանուր առմամբ նրանք բոլորն էլ գտնվում են ֆիզիկական ավելի լավ վիճակում, քան կարող էր ենթադրվել:
Հիշեցնենք, որ չիլիացի հանքափորները հորատանցքում արգելափակված էին օգոստոսի 5-ից ի վեր: Նրանց հորից դուրս բերելու ուղղությամբ աշխատանքները մեկնարկել էին սեպտեմբերի 17-ին:
