![\"\"](\"https://www.aravot.am/2010/aravot_arm/October/14/p25.jpg\")
Եվրո 2012-ի հերթական տուրն աչքի ընկավ նաեւ տհաճ անակնկալով: Դա Ճենովայում նշանակված Իտալիա-Սերբիա հանդիպման ձախողումն էր, որի գլխավոր մրցավար՝ շոտլանդացի Կրեյգ Թոմսոնը, սերբ ֆուտբոլասերների խուլիգանական պահվածքի հետեւանքով տրիբունաներում անվտանգության ապահովումն անհնարին դառնալու պատճառով արդեն 6-րդ րոպեին խաղը դադարեցնելու որոշում է ընդունել: Իտալական ԶԼՄ-ների տեղեկացմամբ, սերբ ֆանատները տեղի ոստիկանության հետ մարտականորեն հարաբերվելու տրամադրություն ունեցել են դեռ ցերեկվանից: Նրանք քարեր են նետել անգամ իրենց թիմին ստադիոն բերող ավտոբուսի վրա, ինչի հետեւանքով վնասվածք է ստացել ու կազմից հանվել դարպասապահ Վլադիմիր Ստոյկովիչը: Այնուհետեւ սերբ ֆանատներն անկարգությունները շարունակել են նաեւ «Լուիջի Ֆերրարի» ստադիոնում: Խաղի մեկնարկը, դաշտի տերերի տուգանային հրապարակ նետած ծխաբերի պատճառով, հետաձգվել է 35 րոպե: Իսկ երբ զարգացումներն ավելի բուռն են դարձել, գլխավոր մրցավարն արդեն 6-րդ րոպեին այն դադարեցրել է:
Այժմ սերբերին ամենայն հավանականությամբ տեխնիկական պարտություն կգրանցվի: Սակայն բացառված չէ նաեւ, որ ՈՒԵՖԱ-ն այդ երկրի նկատմամբ բացառիկ վճիռ կայացնի՝ հեռացնի մրցաշարից:
«AP» գործակալությունը երեկ արդեն տեղեկացրել է, որ Ֆուտբոլային ասոցիացիաների եվրոպական միությունը՝ ՈՒԵՖԱ-ն, արդեն սկսել է «Եվրո 2012» ընտրական մրցաշարի Իտալիա-Սերբիա հանդիպման ձախողման պատճառների եւ տեղի ունեցած իրադարձությունների հետաքննությունը եւ որոշում կկայացնի հոկտեմբերի 28-ին:
