Գեղեցիկ սեռի համար առաջին հայացքից բնական եւ անհրաժեշտ համարվող երկու շաղկապված երեւույթները՝ նորաձեւությունը եւ նիհարելու ցանկությունը, շատ կարեւոր նրբություններ եւ թաքնված վտանգներ ունեն: Գաղտնիք չէ, որ հիմնականում իգական սեռն է ձգտում նիհարել, ունենալ մոդելային կազմվածք: Բայց հաճախ մոդելների կառուցվածքը պահպանելը լուրջ խնդիրներ է առաջացնում նրանց առողջության հարցում: Շատ մոդելներ տանջալից դիետաներ են պահում իրենց տեսքն ու աշխատանքը չկորցնելու համար: Իսկ նիհարեցնող դիետաները առաջացնում են սննդի նկատմամբ զզվանքի զգացողություն եւ բժշկությանը հայտնի ծայրահեղ վտանգավոր վիճակ՝ անորեքսիա, որն էլ մահվան պատճառ է դառնում: Բժիշկները նշում են, որ առավել վտանգավոր է, երբ դեռ չձեւավորված կազմվածքով դեռահասներն են զբաղվում թերսնմամբ՝ «վաստակելով» անպտղության հեռանկարը: Մասնագետները շեշտում են, որ արհեստականորեն «հրամցվող» յուրաքանչյուր չափորոշիչ, օրինակ՝ 90/60/90-ը, անիմաստ է:
