Հայերը ձգտում են «դրսում» սովորել

Հերթական կրթական ցուցահանդեսը

«Հայկական կրթական համակարգը զարգացած չէ, նոր ձեւավորված կրեդիտային համակարգը թերի է, եւ ուսանողներիս չի բավարարում տրված գիտելիքը, դրանով ոչ մի արդյունքի ապագայում չես կարող հասնել: Ունեմ տեղի ամերիկյան եւ դրսի համալսարաններում սովորող ընկերներ, որ հավաստիացնում են, թե 2 տարի դրսում մագիստրատուրա սովորելն իրենց ավելի շատ բան է տվել, քան սեփական երկրի համալսարանում 4 տարվա կրթությունը»,- «Առավոտի» հետ զրույցում ասում է ԵՊՀ մաթեմատիկայի եւ մեխանիկայի ֆակուլտետի ուսանող Գոռ Էլչյանը: Նա ցանկանում է իր կրթությունը շարունակել արտերկրի որեւէ բուհում: Երեկ այդ նպատակով մեր զրուցակիցը մասնակցում էր Ամերիկյան համալսարանում կազմակերպված կրթական տեղեկատվական ցուցահանդեսին: Այն կազմակերպել էր Միջազգային կրթության ամերիկյան խորհուրդների Կրթական խորհրդատվական կենտրոնը: Ցուցահանդեսն այնքան մարդաշատ էր, որ մոտ 30 րոպե պահանջվեց ներս մտնելու եւ կազմակերպիչներին գտնելու համար: Հայ երիտասարդները միայն տեղյակ էին, որ հարցաթերթիկ լրացնելով մեծ հնարավորություն ունեն ընդունվել որեւէ միջազգային բուհ: Պարզվեց, սակայն, որ տեղեկատվական թերթիկը միայն վիճակագրություն ունենալու համար էր՝ իմանալու, թե քանի հայ երիտասարդ է ցանկանում կրթությունը շարունակել արտերկրում: «Առավոտի» հետ զրույցում «Միջազգային կրթության ամերիկյան խորհուրդներ» կազմակերպության ավագ կրթական խորհրդատու Գայանե Գրիգորյանն ասաց, որ նման կրթական ցուցահանդես Հայաստանում կազմակերպվում է արդեն 15-րդ անգամ, նպատակն է՝ ուսանողությանը իրազեկ դարձնել Հայաստանում գործող միջազգային տարբեր, հատկապես Ամերիկայի Միացյալ Նահանգների կառավարության կողմից ֆինանսավորվող ծրագրերին: «Կրթություն ԱՄՆ-ում» խորագիրն ունեցող ցուցահանդեսին մասնակցում էին Բերգենի համայնքային քոլեջը, Լինն համալսարանը, Նյու Յորքի պետական համալսարանը, Հալթի միջազգային բիզնես դպրոցը, Հարավային Կարոլինայի եւ Տուլսայի համալսարանները, ինչպես նաեւ Հայաստանի Ամերիկյան համալսարանը: Ինչպես նշեց Գ. Գրիգորյանը, այդ համալսարաններում սովորելու համար հայ ուսանողները պետք է վճարեն, բայց լավագույն ուսանողները ստանում են ֆինանսական օգնություն նաեւ տվյալ համալսարանից: «Ամերիկյան համալսարանները հետաքրքրված են ունենալու միջազգային ուսանողներ, եւ նրանք մեծ գումարներ են տրամադրում օտարերկրյա ուսանողներին»,- ասաց մեր զրուցակիցը: Նրա խոսքով, միջազգային կրթությունն այժմ տարածված է ամբողջ աշխարհում, եւ յուրաքանչյուր ուսանող գոնե մեկ կիսամյակ պետք է սովորի մեկ այլ ուսումնական հաստատությունում, որպեսզի գոնե ունենա համեմատության եզր:

Եվրոպայի եւ Եվրասիայի տարածաշրջանային կրթական խորհրդատվական գծով կոորդինատոր Էնն Մերիլը «Առավոտի» հետ զրույցում հավաստիացրեց՝ ամերիկացիները շահագրգռված են, որ հնարավորինս շատ հայ ուսանողներ սովորեն ԱՄՆ-ում: Ամերիկացի Է. Մերիլը բնակվում է Կիեւում եւ 13 երկրների 50 խորհրդատվական կենտրոններում կազմակերպվող կրթական ցուցահանդեսների աջակիցն է: Մեր զրուցակիցն ասաց, որ ԱՄՆ-ում ամենից շատ ուսանողները Չինաստանից, Հոնկոնգից, Հնդկաստանից են: Նախորդ տարվա տվյալներով՝ 400 հայ ուսանող է սովորում ԱՄՆ-ում: Նյու Յորքի պետական համալսարանի ներկայացուցիչ Փեթ Ֆեչերը արդեն 2 տարի բնակվում է Հայաստանում եւ օգնում անգլերենի հայ մասնագետներին՝ վերապատրաստման հարցում: Ասում է՝ հայ ուսուցիչներն ավելի լավ քերականություն գիտեն, քան ամերիկացիները: Նրա խոսքով, Նյու Յորքի համալսարան ընդունվելը հեշտ չէ, նախ պետք է թեստ հանձնել անգլերենից, լինել վճարունակ ու նաեւ վիզա ստանալ: «Ամերիկյան կառավարության համար կարեւոր է նաեւ, որ կրթությունն ավարտելուց հետո ուսանողները վերադառնան իրենց երկիր, ոչ թե մնան Ամերիկայում»,- ասաց Փ. Ֆեչերը: