![\"\"](\"https://www.aravot.am/2010/aravot_arm/October/12/p16.jpg\")
Այս օրերին համառ լուրեր են պտտվում այն մասին, թե վերեւներում վճռել են երկար ժամանակ առանց գեղարվեստական ղեկավարի եւ գլխավոր ռեժիսորի աշխատող Օպերայի եւ բալետի ազգային ակադեմիական թատրոնի ճակատագիրը: Ասում են՝ գեղարվեստական ղեկավարի թափուր պաշտոնը հնարավոր է զբաղեցնի ՀՊՖՆ գեղարվեստական ղեկավար եւ գլխավոր դիրիժոր Էդուարդ Թոփչյանը, իսկ գլխավոր ռեժիսորինը՝ կինոռեժիսոր Վիգեն Չալդրանյանը: Փաստենք, որ Օպերային թատրոնը ՊՈԱԿ է, իսկ ըստ ՊՈԱԿ-ի մասին օրենքի՝ գեղարվեստական ղեկավար եւ գլխավոր ռեժիսոր նշանակելու իրավասությունը պատկանում է ՊՈԱԿ-ի տնօրենին, տվյալ պարագայում՝ Կամո Հովհաննիսյանին:
«Առավոտը» զրուցեց Կ. Հովհաննիսյանի եւ Էդ. Թոփչյանի հետ, իսկ Վ. Չալդրանյանը ներկայումս արտերկրում է:
![\"\"](\"https://www.aravot.am/2010/aravot_arm/October/12/p17.jpg\")
Պարոն Հովհաննիսյանը փոխանցեց հետեւյալը. «Ես ձեզնից եմ լսում այդ մասին: Ընդամենը կնշեմ, որ թատրոնի կյանքը գնում է բնական հունով: Լարված, ստեղծագործական մթնոլորտ է տիրում, քանի որ պատրաստվում ենք միանգամից 3 պրեմիերաների՝ Ալ. Հարությունյանի «Սայաթ-Նովա», Վերդիի «Աիդա» օպերաները եւ Պրոկոֆեւի «Ռոմեո եւ Ջուլիետ» բալետը»:
Էդ. Թոփչյանն էլ «Առավոտին» ասաց. «Ես տեղյակ չեմ նման լուրերից, գերծանրաբեռնված աշխատում ենք, ընթացքի մեջ է Երեւանյան՝ 4-րդ միջազգային փառատոնը»: Հիշեցնենք, որ ՀՊՖՆ գեղարվեստական ղեկավարը վերջին շրջանում 9 օպերաների համերգային կատարումներ եւ ներկայացումներ է իրականացրել, ընդ որում վերջինը՝ Չայկովսկու «Եվգենի Օնեգինը», հենց Վ. Չալդրանյանի հետ:
