![\"\"](\"https://www.aravot.am/2010/aravot_arm/October/12/p10.jpg\")
Ամեն առավոտ ժամը 10-ին Վանաձորից Նոյեմբերյան է ուղեւորվում խորհրդային արտադրության «ՊԱԶ» մակնիշի խիստ մաշված ավտոբուս, որի նորոգումը վարորդը կատարում է հենց ընթացքի ժամանակ: Ավտոբուսը Նոյեմբերյանից Հայաստանի՝ մեծությամբ երրորդ քաղաք է վերադառնում ժամը 14-ին: Այս տանջահար ավտոբուսով հիմնականում երթեւեկում են սոցիալապես անապահով մարդիկ: Նրանց դժգոհությունն է հարուցել այն, որ Նոյեմբերյանից Ալավերդի (50 կմ հեռավորություն) երթեւեկի համար ուղեվարձը 500 դրամ է, իսկ Ալավերդի քաղաքից Վանաձոր հասնելու համար (վերստին՝ 50 կմ) կրկնակի էժան՝ 250 դրամ: Այս կապակցությամբ ուղեւորները բողոքել են «ՊԱԶ»-ի վարորդներին: Արագընթաց 21-րդ դարին խիստ անհարիր դեղին «ՊԱԶ»-երը կրիայի արագություն ունեն եւ բարոյապես եւ ֆիզիկապես մաշված «անտիլոպները» Վանաձոր-Նոյեմբերյան 100 կմ ճանապարհը հաղթահարում են ուղիղ երեք ժամում:
Այս ուղերթի ավտոբուսները նախկինում պատկանել են Վանաձոր քաղաքի ավտոբուսային պարկին: Ներկայումս սույն հիմնարկը սեփականաշնորհված է եւ պատկանում է վանաձորցի «Պետունցի Արմեն» մականունով հայտնի մեկին:
