Հունվարին ՅՈՒՆԵՍԿՕ-ի կենսագիտության ամբիոնի վարիչ եւ «Համահայկական գիտական խորհուրդ» հ/կ նախագահ, պրոֆեսոր Սիներիկ Հայրապետյանը բաց նամակով դիմել էր ՀՀ նախագահ Սերժ Սարգսյանին՝ առաջարկությամբ. «հրաժարվել խորհրդային համակարգից ժառանգված հանցածին եւ անբարոյական գիտահամալսարանական համակարգից, որի պատճառով գիտությունը հայտնվել է կաթվածահար վիճակում եւ փոխարենը կյանքի կոչել բնագավառը ազգային շահին ծառայացնելու բարեփոխումների ծրագիր»: Որպես վերջինիս տարբերակ, նա առաջարկել է իր եւ համախոհ գիտնականների կողմից մշակված եւ դեռեւս 1990 թվականին երկրի առաջին նախագահ Լեւոն Տեր-Պետրոսյանին ներկայացված ծրագիրը:
Ս. Հայրապետյանի նամակին հետեւել է փետրվար ամսին ՀՀ ԳԱԱ նախագահ Ռադիկ Մարտիրոսյանի կողմից ստորագրված ԳԱԱ-ի նախագահության դիմումը՝ ՀՀ նախագահին: Հայրապետյանը կարծում է, որ ԳԱԱ նախագահի նամակը, չունենալով բովանդակային ոչ մի կապ իր առաջարկության հետ, պարունակում է մտացածին հերյուրանքներ եւ ապակողմնորոշիչ տեղեկություններ իր անձի եւ նրա հիմնադրած ՅՈՒՆԵՍԿՕ-ի ամբիոնի մասին. «Առաջարկվում էր կենտրոնը փակել՝ որպես պետական միջոցները հանցավոր փոշիացնող հիմնարկություն»: Ըստ Ս. Հայրապետյանի՝ ՀՀ նախագահի վերահսկողության ծառայությունը, ստանալով ԳԱԱ-ի նախագահության հաշվեհարդար հիշեցնող առաջարկությունը, հանձնարարել է ՀՀ ԿԳՆ-ին՝ պարզաբանում տալ հարցի մասին: Նախարարի հրամանով էլ ստեղծվել է հանձնաժողով, որի ղեկավար է կարգվել ԳԱԱ ակադեմիկոս-քարտուղար Վիլեն Հակոբյանը: ՅՈՒՆԵՍԿՕ-ի ամբիոնի վարիչի համոզմամբ, խնդիրը այդպիսով մղվել է փակուղի: Այժմ պրոֆեսոր Սիներիկ Հայրապետյանը պատրաստվում է դիմել դատարան եւ, ինչպես նշված է «Առավոտին» ուղարկված նամակում. «Դատարանի միջոցով փորձել ապացուցել, որ ՀՀ նախագահին ուղղված իր նամակի փաստերը, որ «Հայաստանի ներկայիս գիտավարչական համակարգը հանցածին է եւ անբարոյական», իսկապես ճիշտ են եւ անառարկելի»:
