![\"\"](\"https://www.aravot.am/2010/aravot_arm/October/8/p19.jpg\")
Միացյալ Նահանգները ճանաչում է Վրաստանի կողմից այդ երկրի զավթված տարածքների վերաբերյալ պետական ռազմավարության իրականացման նպատակը եւ պատրաստ է մասնակցել դրա իրագործմանը: Trend.az-ի փոխանցմամբ, այդ մասին ասված է վրաց-ամերիկյան ռազմավարական գործընկերության հարցերի հանձնաժողովի շրջանակներում Վրաստանի վարչապետ Նիկա Գիլաուրիի (նկարում) եւ ԱՄՆ պետքարտուղար Հիլարի Քլինթոնի միջեւ տեղի ունեցած հանդիպման արդյունքներն ամփոփող ԱՄՆ Պետդեպարտամենտի՝ երեկ տարածած հայտարարության մեջ:
Փաստաթղթում հերթական անգամ ընդգծված է, որ «ԱՄՆ-ն աջակցում է Վրաստանի՝ ՆԱՏՕ-ին անդամակցելու ձգտումներին, ողջունում է Վրաստանի պաշտպանության ոլորտում ընթացող բարեփոխումներն ու ճանաչում է Վրաստանի ծանրակշիռ ներդրումը Աֆղանստանում ՆԱՏՕ-ի գործողություններին»:
Հայտարարության մեջ նաեւ ասված է, թե վրացական կողմը պարտադիր կերպով պետք է շարունակի աշխատել այնպիսի հարցերի ուղղությամբ, ինչպիսիք են ժողովրդավարական ինստիտուտների, քաղաքական բազմակարծության, ընտրական միջավայրի, ԶԼՄ-ների ազատության, օրենքի գերակայության եւ դատարանի անկախության կատարելագործումը:
ԱՄՆ պետքարտուղար Քլինթոնը հերթական անգամ Ռուսաստանին կոչ է արել իր ռազմական համակազմը դուրս բերել Աբխազիայից եւ Հարավային Օսեթիայից՝ դրանք համարելով վրացական տարածքներ: «Մենք շարունակում ենք կոչ անել Ռուսաստանին՝ վերջ դնել վրացական տարածքների բռնազավթմանը»,- հանդիպման ավարտին ասել է Հիլարի Քլինթոնը:
