Գեղարքունիքի մարզպետարանի աշխատակազմի ֆինանսական եւ սոցիալ- տնտեսական զարգացման վարչությունից ստացված տվյալների համաձայն՝ 2010 թվականի սեպտեմբերի 1-ի դրությամբ մարզի համայնքներում սեփական եկամուտների հավաքագրման միջին ցուցանիշը կազմում է 77%: Հավաքագրման անենաբարձր ցուցանիշն ապահովել է Վարդենիսի տարածաշրջանը՝ 106,2%: Ցածր եկամուտ են ապահովել Վահան, Դրախտիկ, Աղբերք, Արծվանիստ, Գեղարքունիք եւ Լանջաղբյուր համայնքները՝ 35-40%:
Հիշեցնենք, որ 2010-ի առաջին 8-9 ամիսներին սեփական եկամուտների հավաքագրումը առանձնապես բարձր չէ նաեւ Արագածոտնում («Առավոտ», 23.09.2010) եւ Սյունիքում («Առավոտ», 28.09.
2010):
Հոկտեմբերի 6-ին մարզպետների հետ ամփոփելով ընթացիկ տարվա առաջին ինն ամիսների սեփական եկամուտների հավաքագրման ցուցանիշները, ՀՀ տարածքային կառավարման նախարար Արմեն Գեւորգյանը ասել է, որ Արագածոտնի, Շիրակի եւ Գեղարքունիքի մարզերում արձանագրվել է հողի հարկի հավաքագրման տեմպերի նվազում եւ մարզպետներին հանձնարարել է միջոցներ ձեռնարկել ցուցանիշները բարելավելու ուղղությամբ եւ ընդգծել, որ նախորդ տարվա նույն ժամանակահատվածի հավաքագրման մակարդակը չապահովելու համար որեւէ հիմնավոր պատճառ չկա:
