ՀՀ ԱՆ դատական ակտերի հարկադիր կատարումն ապահովող ծառայությունում երեկ տեղի ունեցավ ծառայության ղեկավարության եւ Համաշխարհային բանկի Դատաիրավական բարեփոխումների երկրորդ ծրագրի ներկայացուցիչների հանդիպումը: ՀՀ Գլխավոր հարկադիր կատարող Միհրան Պողոսյանը ներկայացրեց ծառայության աշխատանքի ավտոմատացման գործում ներկա հաջողությունները եւ ապագա անելիքները: Մասնավորապես, ծրագրի գրասենյակի եւ ծառայության համատեղ ուժերով ավտոմատացվել են մի շարք գործառույթներ, որոնք բերել են ժամանակի եւ նյութական միջոցների խնայմանը, ինչը իր հերթին նպաստել է ծառայության աշխատանքի արդյունավետության բարձրացմանը: ԴԱՀԿ ծառայության տեղեկատվական տեխնոլոգիաների ներդրման եւ համակարգի ավտոմատացման բաժնի պետ Գագիկ Հարությունյանը ներկայացրեց էլեկտրոնային վարույթի ներդրման եւ ծառայության համակարգում VoIP տեխնոլոգիաի կիրառման հեռանկարները: Դատաիրավական բարեփոխումների երկրորդ ծրագրի պետական հատվածի մասնագետ Կլաուս Դեքերը գոհունակությամբ նշեց, որ տպավորված է ծրագրի շրջանակներում ԴԱՀԿ ծառայությունում կատարված աշխատանքով: «Շատ կարեւոր է, որ մենք լավ գործընկերներ ունենք ԴԱՀԿ ծառայությունում: Մեր միջնաժամկետ գնահատականը գերազանց է»,- նշեց Կ. Դեքերը:
